കൊച്ചി: നെടുമ്പാശ്ശേരി ദേശീയപാതയിലെ കുഴിയില്‍ വീണ് ബൈക്ക് യാത്രികന്‍ മരിച്ച സംഭത്തില്‍ ഹാഷിമിനെ ഇടിച്ച വാഹനം പിടികൂടി. വാഹനം ഓടിച്ചിരുന്ന ബംഗലൂരു സ്വദേശി ഹനുമന്തപ്പയെ പൊലിസ് അറസ്റ്റ് ചെയ്തു. കര്‍ണാടക രജിസ്ട്രേഷനിലുള്ള ടാങ്കര്‍ ലോറിയാണ് പിടികൂടിയത്. എന്നാല്‍ വാഹനം ഹാഷിമിനെ ഇടിച്ചത് അറിഞ്ഞില്ലെന്നാണ് ഹനുമന്തപ്പ പൊലിസിന് മൊഴി നല്‍കിയത്.

മറ്റൊരാളുടെ അനാസ്ഥ മൂലമുണ്ടായ മനഃപൂര്‍വമല്ലാത്ത നരഹത്യ, അപകടമുണ്ടാക്കുന്ന തരത്തില്‍ വാഹനമോടിക്കുക എന്നീ കുറ്റങ്ങള്‍ ചുമത്തി ഹനുമന്തപ്പക്കെതിരെ പൊലിസ് കേസെടുത്തു.

ഇടപ്പള്ളി മണ്ണുത്തി ദേശീയപാതയില്‍ നെടുമ്പാശേരിയിലെ കുഴിയില്‍ വീണുണ്ടായ അപകടത്തിലാണ് മാഞ്ഞാലി സ്വദേശി ഹാഷിം മരിച്ചത്. ദേശീയപാതയിലെ ഗട്ടറില്‍ വീണ് റോഡിലേക്ക് തെറിച്ചു വീണ ഹാഷിമിനെ മറ്റൊരു വാഹനം ഇടിച്ചതായാണ് എഫ്‌ഐആറില്‍ പറയുന്നത്. അങ്കമാലി ബദരിയ ഹോട്ടലിലെ ജീവനക്കാരനായിരുന്ന ഹാഷിം ജോലി കഴിഞ്ഞ് വീട്ടിലേക്ക് വരുമ്പോഴായിരുന്നു അപകടം ഉണ്ടായത്