വേങ്ങര: ഊരകം കരിമ്പിലിയില്‍ അനധികൃത മദ്യവില്‍പന നടക്കുന്നതായി നാട്ടുകാരുടെ പരാതി. നായര്‍പീടികയില്‍ സ്വകാര്യ വ്യക്തിയും അഞ്ചുപറമ്പ് റോഡിലെ കച്ചവട സ്ഥാപനം കേന്ദ്രീകരിച്ചുമാണ് സുലഭമായി മദ്യം വില്‍ക്കുന്നത്. വിദ്യാര്‍ഥികള്‍ ഉള്‍പ്പെടെയുള്ളവര്‍ ഇവിടെ മദ്യം വാങ്ങാനെത്തുന്നതായും ആക്ഷേപമുണ്ട്.
സമീപ പ്രദേശങ്ങളിലെ ആവശ്യക്കാര്‍ക്ക് രഹസ്യമായി മദ്യം എത്തിച്ചു കൊടുക്കുകയും ചെയ്യുന്നുണ്ട്. മലപ്പുറത്തെ ബീവറേജസ് ഔട്ട്‌ലെറ്റില്‍ നിന്ന് എത്തിക്കുന്ന മദ്യം കൂടുതല്‍ തുകക്കാണ് വില്‍ക്കുന്നത്.
വൈകുന്നേരങ്ങളിലാണ് ആവശ്യക്കാര്‍ മദ്യം തേടിയെത്തുന്നത്. അനധികൃത മദ്യ വില്‍പന തടയാന്‍ അധികൃതര്‍ നടപടിയെടുക്കണമെന്ന് നാട്ടുകാര്‍ ആവശ്യപ്പെട്ടു.