കോഴിക്കോട് • ധാർമികതയുടെ വശത്തുനിന്നാണ് താൻ സംസാരിക്കുന്നതെന്ന് മുസ് ലിം ലീഗ് നിയമസഭാ കക്ഷി ഉപനേതാവ് ഡോ. എം.കെ മുനീർ. സാമൂഹിക വിഷയങ്ങളിൽ തന്റെ നിലപാടിന്റെ അടിസ്ഥാനം ധാർമികതയാണ്. എന്നാൽ പറഞ്ഞതിന് നേർ വിപരീതമായി വാർത്ത നൽകുകയാണ് മാധ്യമങ്ങൾ ചെയ്യുന്നതെന്ന് അദ്ദേഹം പറഞ്ഞു.
മാധ്യമങ്ങൾ ഉയർത്തുന്ന ആശയം മറ്റുള്ളവരുടെ തലയിൽ അടിച്ചേൽപ്പിക്കുകയാണ് ചെയ്യുന്നത്. താൻ മന്ത്രി ആയിരിക്കെയാണ് പോക്‌സോ നിയമം നടപ്പാക്കാൻ മുൻകൈ എടുത്തത്. ബാലാവകാശ കമ്മിഷൻ ആദ്യമായി നടപ്പാക്കിയതും അന്നാണ്. ജെൻഡർ ജസ്റ്റിസിന് വേണ്ടി എപ്പോഴും നിലകൊണ്ടയാളാണ് താൻ. സ്ത്രീകളുടേയും കുട്ടികളുടേയും വകുപ്പ് കൈകാര്യവും ചെയ്തു. പോക്‌സോ നടപ്പിലാക്കുമ്പോൾ സംസ്ഥാനത്ത് ആവശ്യമായ ക്രമീകരണങ്ങൾക്കൊക്കെ മന്ത്രിയെന്ന നിലയിൽ നേതൃത്വം നൽകി. ഇതിനെ കുറിച്ചെല്ലാം വ്യക്തമായ ധാരണയുള്ള താൻ എന്തിനാണ് പോക്‌സോ എന്ന് ചോദിക്കുമോ? ട്രോളുകളിൽ തന്നെ സ്വവർഗരതിക്കാരനായാണ് ചിത്രീകരിക്കുന്നത്. ഇത് തന്റെ സ്വത്വത്തെ പോലും ബാധിക്കുന്നതായും മുനീർ കൂട്ടിച്ചേർത്തു. സംസ്ഥാനത്ത് പോക്‌സോ കേസുകൾ വർധിക്കുന്നു. എന്നാൽ കുറ്റവാളികൾ ശിക്ഷിക്കപ്പെടുന്നില്ല. ലിംഗ സമത്വ വിഷയത്തിൽ സർക്കാരിന്റെ നിലപാട് മാറ്റം സ്വാഗതാർഹമാണ്.
ചില വാക്കുകൾ മാറ്റിയതു കൊണ്ടുമാത്രം യഥാർഥ പ്രശ്നം പരിഹരിക്കപ്പെടുന്നില്ല. അതിനാൽ ഈ വിഷയത്തിൽ കൂടുതൽ ചർച്ചകളും മാറ്റങ്ങളും വേണം. ഏതു പുരോഗമനത്തിനും എതിരായതുകൊണ്ടല്ല. സമൂഹം ആരാജകത്വത്തിലേക്ക് പോകുമ്പോൾ അതിനെതിരേ പ്രതികരിക്കേണ്ടി വരുന്നത് സ്വാഭാവികമാണെന്നും മുനീർ കൂട്ടിച്ചേർത്തു.