വേങ്ങര: ക്വാറികളിലെ പാറമണല്‍ അവശിഷ്ടങ്ങള്‍ തോട്ടില്‍ തളളുന്നതായി പരാതി. ആയിരക്കണക്കിന് പേരുടെ ആശ്രയമായ വേങ്ങര തോട്ടിലാണ് മാലിന്യം തള്ളുന്നത്. ക്വാറിമണല്‍ കലര്‍ന്ന്  ഒഴുകിയെത്തുന്ന തോട്ടിലെ വെള്ളം ദുരിതം വിതക്കുന്നതായി നാട്ടുകാര്‍ പറയുന്നു.
ഊരകം, കണ്ണമംഗലം പഞ്ചായത്തിലെ വിവിധ ക്വാറികളില്‍ നിന്നും ക്രഷറുകളില്‍ നിന്നും പാറമണല്‍ ശുചീകരിച്ച അവശിഷ്ടങ്ങള്‍ ലോറികളില്‍ കൊണ്ടുവന്ന് തോട്ടില്‍ ഒഴുക്കിവുട്ടന്നതായാണ് ആക്ഷേപം. തോടിന് ഇരുവശങ്ങളിലും ഏക്കര്‍ കണക്കിന് വയലുകളിലേക്കും മാലിന്യങ്ങളെത്തുന്നുണ്ട്. കുളിക്കുവാനും അലക്കുവാനും തോട്ടിലെ വെളളം ഉപയോഗിക്കുന്നവര്‍ക്ക് ജലജന്യ രോഗങ്ങളും വ്യാപകമായിട്ടുണ്ട്.
മാലിന്യ നിക്ഷേപം തടയുന്നതിന് അടിയന്തര നടപടികള്‍ വേണമെന്ന് ആവശ്യപ്പെട്ട് വേങ്ങര പാടശേഖര സമിതിയും രംഗത്തെത്തി.