ലണ്ടന്‍: ഐ.എസുകാരെന്നാരോപിച്ച് മൂന്നുപേരെ ലണ്ടനില്‍ വിമാനത്തില്‍ നിന്ന് ഇറക്കിവിട്ടു. ബ്രിട്ടീഷ് പൗരന്മാരും സഹോദരങ്ങളുമായ മൂന്നുപേര്‍ക്കാണ് ദുരനുഭവം. സഹയാത്രക്കാര്‍ ഐ.എസുകാരാണെന്ന് ആരോപിച്ചതിനെ തുടര്‍ന്ന് ഇവരെ പൊലിസ് കസ്റ്റഡിയിലെടുക്കുകയും ചോദ്യംചെയ്യുകയുമായിരുന്നു. സഹോദരങ്ങളായ് സക്കീന ദരാസ് (24), മറിയം (19), അലി (21) എന്നിവരെയാണ് ഐ.എസുകാരെന്ന് ആരോപിച്ച് പൊലിസ് കസ്റ്റഡിയിലെടുത്തത്. ഈസിജെറ്റ് ഫ്‌ളൈറ്റില്‍ ലണ്ടനില്‍ നിന്ന് ഇറ്റലിയിലെ നേപ്പിള്‍സിലേക്ക് കഴിഞ്ഞ 17നായിരുന്നു ഇവരുടെ യാത്ര. വിമാനം ടേക്ക് ഓഫ് ചെയ്യുന്നതിനുമുമ്പാണ് വിമാനജീവനക്കാര്‍ ഇവര്‍ ഐ.എസുകാരാണെന്ന് ആരോപിച്ചത്. തുടര്‍ന്ന് സായുധ പൊലിസ് ഒരുമണിക്കൂറോളം ഇവരെ ചോദ്യംചെയ്തു.