ദുബൈ: ഇന്ത്യന്‍ ക്രിക്കറ്റ് ടീം പരിശീലകന്‍ രാഹുല്‍ ദ്രാവിഡ് കൊവിഡ് മുക്തനായി ദുബൈയില്‍ ഏഷ്യാ കപ്പിനുള്ള ഇന്ത്യന്‍ സംഘത്തിനൊപ്പം ചേര്‍ന്നുവെന്ന് റിപ്പോര്‍ട്ടുകള്‍. ഇതോടെ ദ്രാവിഡിനു പകരം താത്കാലിക പരിശീലകനായി ഇന്ത്യന്‍ ടീമിനൊപ്പമുണ്ടായിരുന്ന ദേശീയ ക്രിക്കറ്റ് അക്കാദമി പരിശീലകന്‍ വി.വി.എസ് ലക്ഷ്മണ്‍ ബംഗളൂരുവിലേക്ക് തിരിച്ചു.ഏഷ്യാ കപ്പിനായി ഇന്ത്യന്‍ സംഘം യു.എ.ഇയിലേക്ക് വരുന്ന സമയത്താണ് ദ്രാവിഡ് കൊവിഡ് ബാധിതനായത്. സിംബാബ്വെ പര്യടനത്തില്‍ ദ്രാവിഡ് ഇന്ത്യന്‍ ടീമിനൊപ്പം ഉണ്ടായിരുന്നില്ല. ഏഷ്യാ കപ്പ് പരിഗണിച്ച് ദ്രാവിഡിനു വിശ്രമം നല്‍കിയതിനാല്‍ ലക്ഷ്മണ്‍ ആയിരുന്നു ഇന്ത്യയുടെ രണ്ടാം നിര സംഘത്തെ പരിശീലിപ്പിച്ചത്.ഏഷ്യാ കപ്പില്‍ ഇന്ത്യക്ക് ഇന്നാണ് ആദ്യ മത്സരം. പാകിസ്താനാണ് ഇന്ത്യയുടെ എതിരാളികള്‍. രാത്രി 7.30ന് ദുബൈ രാജ്യാന്തര സ്റ്റേഡിയത്തില്‍ മത്സരം നടക്കും.