തിരുവനന്തപുരം: സമസ്ത കേരള ജംഇയ്യത്തുല്‍ ഉലമ ഉപാധ്യക്ഷനും കേരള വഖ്ഫ് ബോര്‍ഡ് ചെയര്‍മാനും അനേകം ധര്‍മ സ്ഥാപനങ്ങളുടെ മേധാവിയുമായിരുന്ന പാണക്കാട് സയ്യിദ് ഉമറലി ശിഹാബ് തങ്ങള്‍ സമാരക അവാര്‍ഡ് സമര്‍പ്പണം സെപ്തംബര്‍ അഞ്ച് തിങ്കളാഴ്ച്ച തിരുവനന്തപുരത്ത് നടക്കും. തങ്ങളുടെ സ്മരണക്കായി രൂപം നല്‍കിയ പാണക്കാട് സയ്യിദ് ഉമറലി ശിഹാബ് തങ്ങള്‍ ചാരിറ്റബ്ള്‍ സൊസൈറ്റിയുടെ പ്രഥമ അവാര്‍ഡ് മസ്‌കറ്റ് ഹോട്ടലില്‍ വച്ച് വൈകീട്ട് നാലിന് നടക്കുന്ന ചടങ്ങില്‍ എന്‍.കെ പ്രേമചന്ദ്രന്‍ എം.പിക്ക് പാണക്കാട് സ്വാദിഖലി ശിഹാബ് തങ്ങള്‍ സമ്മാനിക്കും.

മികച്ച പാര്‍ലമെന്റേറിയന്‍ എന്ന നിലയിലാണ് ഇദ്ദേഹത്തിനെ അവാര്‍ഡിനായി തിരഞ്ഞെടുത്തിരിക്കുന്നത്. പ്രതിപക്ഷ നേതാവ് വി.ഡി സതീശന്‍ ചടങ്ങ് ഉദ്ഘാടനം ചെയ്യും. സമസ്ത ജനറല്‍ സെക്രട്ടറി പ്രൊഫ.കെ ആലിക്കുട്ടി മുസ്ലിയാര്‍ അനുസ്മരണ പ്രഭാഷണം നടത്തും. ശശിതരൂര്‍ എം.പി മുഖ്യാതിഥിയായിരിക്കും. പി.കെ കുഞ്ഞാലിക്കുട്ടി എം.എല്‍.എ അനുസ്മരണ ബുള്ളറ്റിന്‍ പ്രകാശനം ചെയ്യും. സൈനുല്‍ ആബിദീന്‍ സഫാരി ഏറ്റുവാങ്ങും.

പാണക്കാട് സയ്യിദ് അബ്ബാസലി ശിഹാബ് തങ്ങള്‍ അവാര്‍ഡ് ജേതാവിന് പൊന്നാട അണിയിക്കും. ഹൈദരലി ശിഹാബ് തങ്ങള്‍ ഹെല്‍പ് സ്‌കീം ഫണ്ട് ഉദ്ഘാടനം ഇ.ടി മുഹമ്മദ് ബഷീര്‍ എം.പി നിര്‍വഹിക്കും. പാണക്കാട് ബഷീറലി ശിഹാബ് തങ്ങള്‍ പ്രഖ്യാപനം നടത്തും. ഡോ. എം.കെ മുനീര്‍ എം.എല്‍.എ മംഗള പത്രം സമര്‍പ്പിക്കും. ചടങ്ങില്‍ മത സാമൂഹിക രംഗത്തെ പ്രമുഖര്‍ സംബന്ധിക്കും.