പ്രത്യേക ലേഖകൻ
തിരുവനന്തപുരം • ലഹരി കുരുക്കിയ കേരളത്തെ വീണ്ടെടുക്കാൻ ഭരണ – പ്രതിപക്ഷ ഐക്യത്തിന് സാക്ഷിയായി നിയമസഭയിലെ ശൂന്യവേള. ലഹരിവ്യാപനം തടയാനുള്ള നടപടികളുമായി ഒറ്റക്കെട്ടായി മുന്നോട്ട് പോകാനും തീരുമാനിച്ചു. സംസ്ഥാനത്തെ ലഹരിവ്യാപനം നിയമസഭയിൽ അടിയന്തര പ്രമേയമായാണ് പ്രതിപക്ഷം ഉന്നയിച്ചത്.

നോട്ടിസ് നൽകി വിഷയം സഭയിലുന്നയിച്ച വിഷ്ണുനാഥിനെ മുഖ്യമന്ത്രിയും സ്പീക്കറും അഭിനന്ദിച്ചു. വിഷയം ഗൗരവമുള്ളതാണെങ്കിലും മൂന്നു ബില്ലുകൾ ചർച്ച ചെയ്യേണ്ടതിനാൽ സമയമില്ലെന്ന് മുഖ്യമന്ത്രി മറുപടി നൽകി. തുടർന്ന് സ്പീക്കർ അടിയന്തര പ്രമേയത്തിന് അനുമതി നിഷേധിച്ചു. മുഖ്യമന്ത്രിയുടെ നിലപാട് അംഗീകരിച്ച പ്രതിപക്ഷ നേതാവ് ലഹരിക്കെതിരായ പോരാട്ടത്തിൽ സർക്കാരിന് പിന്തുണ പ്രഖ്യാപിച്ചു.
അന്താരാഷ്ട്ര ലഹരി കടത്തുകാരുടെ ഇടത്താവളമായി കേരളം മാറുന്നുവെന്ന് നോട്ടിസ് അവതരിപ്പിച്ച് വിഷ്ണുനാഥ് പറഞ്ഞു. യുവാക്കളുടെ ഔദ്യോഗിക ആനന്ദമാർഗം എം.ഡി.എം.എ ആയി മാറുന്നുവെന്നും വിഷ്ണുനാഥ് പറഞ്ഞു. സ്‌കൂളുകൾ ലഹരി സംഘങ്ങളുടെ പിടിയിലാണ്.
സ്ഥാപനത്തിന്റെ പേര് മോശമാകുമെന്ന് കരുതിയാണ് അധ്യാപകർ ഇത് പുറത്ത് പറയാത്തത്.സ്‌കൂൾ പരിസരത്ത് ലഹരി വിൽക്കുന്നവർക്കെതിരേ കാപ്പ ചുമത്തണമെന്നും വിഷ്ണുനാഥ് ആവശ്യപ്പെട്ടു.

ലഹരി ഉപയോഗവും വ്യാപാരവും സമൂഹത്തിന് ഭീഷണിയാകുന്ന നിലയിലേക്ക് വർധിച്ചെന്നും തടയാൻ ഫലപ്രദ നടപടികളെടുക്കുമെന്നും മുഖ്യമന്ത്രി പറഞ്ഞു. മുമ്പ് കഞ്ചാവുപോലുള്ള ലഹരിവസ്തുക്കളാണ് ഉപയോഗിക്കപ്പെട്ടിരുന്നതെങ്കിൽ സിന്തറ്റിക് രാസലഹരികളുടെ വ്യാപനവും ഉപഭോഗവുമാണ് ഇപ്പോൾ. വിദ്യാഭ്യാസ സ്ഥാപനങ്ങളിൽ ഉൾപ്പെടെ ലഹരിമരുന്നുകൾ എത്തുന്നു. എൻഫോഴ്‌സ്‌മെന്റ് മാത്രമല്ല വിവിധ ജനവിഭാഗങ്ങളുടെയും സർക്കാർ സംവിധാനങ്ങളുടെയും ഏകോപിത സമീപനമാണ് ഇത് തടയാൻ ആവശ്യമെന്നും മുഖ്യമന്ത്രി പറഞ്ഞു.
നമ്മുടെ കുഞ്ഞുങ്ങൾക്കായി എല്ലായിടത്തും ചതിക്കുഴികൾ ഒരുങ്ങിയിരിക്കുന്നതായി പ്രതിപക്ഷ നേതാവ് വി.ഡി സതീശൻ പറഞ്ഞു. സംസ്ഥാനത്തെ ലഹരി വ്യാപനം അജണ്ടയാക്കി യു.ഡി.എഫ് പ്രത്യേക യോഗം ചേർന്ന് ചർച്ച ചെയ്തു.
സർക്കാരിൻ്റെ ലഹരി വിരുദ്ധ പ്രവർത്തനങ്ങൾക്ക് പ്രതിപക്ഷവും യു.ഡി.എഫും ആദ്യാവസാനം ഒപ്പമുണ്ടാകും. ഒന്നിച്ച് നിന്ന് വരും തലമുറയെ രക്ഷിക്കാൻ ശ്രമിക്കണമെന്നും ലഹരി ഉപഭോഗം മാനസികാരോഗ്യ പ്രശ്‌നമായി വളരുകയാണെന്നും അദ്ദേഹം പറഞ്ഞു.