സ്വന്തം ലേഖകൻ
തിരുവനന്തപുരം • വഖ്ഫ് ബോർഡിന്റെ അഡ്മിനിസ്‌ട്രേറ്റീവ് തസ്തികകളിലെ നിയമനങ്ങൾ പി.എസ്.സിക്ക് വിടുന്ന വഖ്ഫ് ബോർഡ് നിയമന ഭേദഗതി ബിൽ റദ്ദാക്കാനുള്ള റിപ്പീലിങ് ബിൽ നിയമസഭ പാസാക്കിയതോടെ ശ്രദ്ധേയമായത് സമസ്തയുടെ നയപരമായ ഇടപെടൽ.

വഖ്ഫ് ബോർഡ് നിയമനങ്ങൾ പി.എസ്.സിക്ക് വിടുന്നത് റദ്ദാക്കുമെന്ന് സമസ്ത കേരള ജംഇയ്യതുൽ ഉലമാ പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങൾക്ക് മുഖ്യമന്ത്രി പിണറായി വിജയൻ ഉറപ്പ് നൽകിയിരുന്നു. ഇതേ തുടർന്നാണ് നിയമസഭാ സമ്മേളനത്തിൽ റിപ്പീലിങ് ബിൽ അവതരിപ്പിച്ചത്. അവതരിപ്പിക്കപ്പെട്ട ബിൽ സഭക്ക് പുറത്തെ സമ്മർദങ്ങളെ തുടർന്ന് റിപ്പീലിങ് ബില്ലിലൂടെ റദ്ദാക്കിയ അപൂർവതകളിൽ ഒന്നായി ഇത് ചരിത്രത്തിൽ ഇടംനേടി.

നിയമസഭ പാസാക്കിയ വഖ്ഫ് ബോർഡ് നിയമന ഭേദഗതി ബിൽ പുനഃപരിശോധിക്കണമെന്ന് സമസ്ത നിവേദനത്തിലൂടെ ആവശ്യപ്പെട്ടിരുന്നു. വിഷയം സംബന്ധിച്ച് സമസ്ത ജന.സെക്രട്ടറി പ്രൊഫ. കെ. ആലിക്കുട്ടി മുസ് ലിയാരുടെ നേതൃത്വത്തിലുള്ള നേതാക്കളുമായി മുഖ്യമന്ത്രി 2021 ഡിസംബർ ഏഴിന് തിരുവനന്തപുരത്ത് ചർച്ച നടത്തിയിരുന്നു. ബിൽ ധൃതിപിടിച്ച് നടപ്പാക്കില്ലെന്നും മുസ് ലിം സംഘടനകളുടെ യോഗം വിളിക്കുമെന്നും ഉറപ്പും നൽകിയിരുന്നു. സമസ്ത കേരള ജംഇയ്യത്തുൽ ഉലമാ പ്രസിഡന്റ് സയ്യിദ് മുഹമ്മദ് ജിഫ് രി മുത്തുക്കോയ തങ്ങളെയും ഇക്കാര്യം അറിയിക്കുകയും ചെയ്തു.
സമസ്തക്ക് നൽകിയ ഉറപ്പിനെ തുടർന്ന് ബില്ലുമായി ബന്ധപ്പെട്ട നടപടികൾ സർക്കാർ നിർത്തിവച്ചിരുന്നു.
2022 ഏപ്രിൽ 20ന് മുഖ്യമന്ത്രി മുസ് ലിം സംഘടനകളുടെ യോഗം വിളിക്കുകയും ആവശ്യം അനുഭാവ പൂർവം പരിഗണിക്കുമെന്ന് ഉറപ്പുനൽകുകയും ചെയ്തിരുന്നു. വഖ്ഫ് നിയമന ഭേദഗതി ബിൽ പിൻവലിക്കുമെന്ന് ജൂലൈ 20ന് നിയമസഭയിലുംമുഖ്യമന്ത്രി അറിയിച്ചു.
കഴിഞ്ഞ ദിവസം വിവിധ ആവശ്യങ്ങൾക്കായി മുഖ്യമന്ത്രിയുമായി കൂടിക്കാഴ്ച നടത്തിയ സമസ്ത നേതാക്കൾ വഖ്ഫ് ബോർഡ് നിയമന ബിൽ റദ്ദാക്കുന്നത് സംബന്ധിച്ച് സർക്കാർ തീരുമാനം വൈകുന്നതിൽ ആശങ്ക അറിയിച്ചിരുന്നു.

ഇതേതുടർന്ന് അടിയന്തരമായി മന്ത്രിസഭ റിപ്പീലിങ് ബിൽ അവതരിപ്പിക്കാൻ തീരുമാനിക്കുകയും ഇന്നലെ ഇത് നിയമസഭയിൽ പാസാക്കുകയും ആയിരുന്നു. മുഖ്യമന്ത്രിയിൽ നിന്ന് ലഭിച്ച ഉറപ്പിന്റെ അടിസ്ഥാനത്തിൽ നയപരമായ നിലപാട് സ്വീകരിച്ച സയ്യിദ് മുഹമ്മദ് ജിഫ് രി മുത്തുക്കോയ തങ്ങളുടെ നിലപാടിന് മാറ്റ് കൂട്ടുന്നതാണ് റദ്ദാക്കൽ ബിൽ.

പ്രശ്‌ന പരിഹാരങ്ങൾക്ക് ആദ്യഘട്ടം ചർച്ചകളും കൂടിയാലോചനകളും നടത്തുകയെന്ന സമസ്തയുടെ പാരമ്പര്യ നിലപാട് തന്നെയാണ് ഈ വിഷയത്തിലും നേതൃത്വം സ്വീകരിച്ചത്.
ഇതേ രീതി തന്നെയായിരുന്നു കഴിഞ്ഞ ദിവസം പിൻവലിച്ച പാഠ്യപദ്ധതി ചട്ടക്കൂടുമായി ബന്ധപ്പെട്ട വിവാദ വിഷയത്തിലും സമസ്തയുടേത്.