തൃശൂര്‍: സി.പി.എമ്മിനെ കടന്നാക്രമിച്ച് പ്രതിപക്ഷ നേതാവ് വി.ഡി സതീശന്‍. സ്വര്‍ണക്കടത്തുകാരുടേയും സ്ത്രീപീഡകരുടേയും സംരക്ഷകരായി സി.പി.എം മാറിയെന്ന് അദ്ദേഹം കുറ്റപ്പെടുത്തി. കള്ളക്കടത്ത് സ്ത്രീ പീഡനക്കേസുകളില്‍ ഒരു ഘട്ടം കഴിഞ്ഞാല്‍ അന്വേഷണം അവസാനിപ്പിക്കുകായാണ്.

കൊലയാളികളെയും കുടുംബങ്ങളെയും പാര്‍ട്ടി സംരക്ഷിക്കുന്നു എന്നും വി.ഡി സതീശന്‍ ആരോപിച്ചു. കരിപ്പൂര്‍ സ്വര്‍ണ്ണക്കടത്ത് കേസില്‍ മുഖ്യമന്ത്രി നിലപാട് വ്യക്തമാക്കണം. കണ്ണൂര്‍ ശാന്തമായപ്പോള്‍ പാര്‍ട്ടി ക്രിമിനല്‍ സംഘങ്ങള്‍ മറ്റു കുറ്റകൃത്യങ്ങള്‍ തുടങ്ങി. സി.പി.എം കണ്ണൂര്‍ ജില്ലാ സെക്രട്ടറി ക്രിമിനല്‍ സംഘങ്ങളെ ഓരോ ദിവസവും ന്യായീകരിക്കേണ്ട സ്ഥിതി വന്നിരിക്കുകയാണ്. രാമനാട്ടുകര സ്വര്‍ണക്കടത്ത് കേസില്‍ മാര്‍ക്കിസ്റ്റ് പാര്‍ട്ടി നേതാക്കള്‍ക്കും പങ്കുണ്ടെന്ന് വി.ഡി സതീശന്‍ ആരോപിച്ചു.

കാസര്‍കോട് ജില്ലാ ആശുപത്രിയിലേക്ക് 450 അപേക്ഷകരുണ്ടായിട്ടും 100 പേരെ ഇന്റര്‍വ്യൂവിന് വിളിച്ചിട്ട് പെരിയ ഇരട്ടക്കൊലക്കേസിലെ ഒന്നാം പ്രതിയുടെ ഭാര്യക്ക് ഒന്നാം റാങ്കും രണ്ടാം പ്രതിയുടെ ഭാര്യക്ക് രണ്ടാം റാങ്കും മൂന്നാം പ്രതികളുടെ ഭാര്യക്ക് മൂന്നാം റാങ്കും നല്‍കി നിയമനത്തെ അട്ടിമറിച്ചെന്നും അദ്ദേഹം കൂട്ടിച്ചേര്‍ത്തു.