തിരുവനന്തപുരം: തിരുവനന്തപുരം പാലോട് മങ്കയത്ത് മലവെള്ളപ്പാച്ചിലില്‍ കാണാതായ രണ്ടാമത്തെയാളുടെ മൃതദേഹവും കണ്ടെത്തി. നെടുമങ്ങാട് സ്വദേശിനി ഷാനി(37)യുടെ മൃതദേഹമാണ് സംഘം തിരിഞ്ഞുള്ള തെരച്ചിലിനൊടുവില്‍ രാവിലെ ഏഴരയോടു കൂടി കണ്ടെത്തിയത്.

അപകടം നടന്ന വാഴത്തോപ്പിന് ഒരു കിലോമീറ്റര്‍ അകലെ മൂന്നാറ്റുമുക്ക് ആറ്റില്‍ ഒഴുകി വന്ന നിലയിലായിരുന്നു മൃതദേഹം. ഷാനിയുടെ ബന്ധു ഒമ്പതു വയസ്സുകാരി നസ്രിയയുടെ മൃതദേഹം ഇന്നലെ രാത്രി കണ്ടെത്തിയിരുന്നു.

ഇന്നലെ വൈകിട്ട് അഞ്ചരയോടെയാണ് മങ്കയം വാഴപ്പണ വെള്ളച്ചാട്ടത്തില്‍ മലവെള്ളപ്പാച്ചിലുണ്ടായത്. നെടുമങ്ങാട് സ്വദേശികളായ പത്ത് പേരടങ്ങിയ രണ്ട് കുടുംബങ്ങളാണ് അപകടത്തില്‍പ്പെട്ടത്. ഇവര്‍ ആറ്റില്‍ കുളിച്ചുകൊണ്ടിരിക്കെ മലവെള്ളപ്പാച്ചിലുണ്ടാവുകയായിരുന്നു. എട്ടുപേരെ നാട്ടുകാര്‍ രക്ഷിച്ചു.