ഇന്ന് അധ്യാപക ദിനം. മനുഷ്യന്‍ മരണം വരേ പഠിതാവാണെന്ന വാക്യത്തെ ഉള്‍ക്കൊണ്ട വ്യക്തിയാണ് വിലങ്ങില്‍ ഹമീദ് മാഷ്. പുതിയ കാര്യങ്ങള്‍ പഠിക്കാനും അത് മറ്റുള്ളവര്‍ക്ക് പഠിപ്പിക്കാനും അദ്ദേഹത്തിന് ഒരിക്കലും മടിയില്ല. അതുകൊണ്ടു തന്നെ അധ്യാപന ജീവിതം ഔദ്യോഗികമായി അവസാനിച്ചിട്ടും ഈ മുയിപ്പോത്തുകാരന്‍ തിരക്കിലാണ്. കഴിഞ്ഞ മൂന്നര പതിറ്റാണ്ടു കാലം കേരളത്തിലെ സ്‌കൂള്‍ പൊതു വിദ്യാഭ്യാസത്തിന്റെ ഗതിവിഗതികളില്‍ ഹമീദ് മാഷിന്റെ സംഭാവനകളുണ്ട്. അധ്യാപകനായും അധ്യാപക പരിശീലനായും നിറഞ്ഞു നിന്ന ശേഷമാണ് കോഴിക്കോട് ജില്ലയിലെ മുയിപ്പോത്തുള്ള ഹമീദ് വിലങ്ങില്‍ സര്‍വീസില്‍ നിന്നു വിരമിച്ചത്. പുതു കാലത്തെ ഓണ്‍ലൈന്‍ സ്റ്റുഡിയോ ക്ലാസ്സ് രംഗത്തും കൗണ്‍സിലിംഗ് മേഖലയിലുംഅദ്ദേഹം ഇപ്പോഴും സജീവമായി തുടരുകയാണ്.1986 ല്‍ വടകര എം യു എം വൊക്കേഷണല്‍ ഹയര്‍ സെക്കന്ററി സ്‌കൂളില്‍ പ്രൈമറി അധ്യാപകനായാണ് തന്റെ ഔദ്യോഗിക ജീവിതം തുടങ്ങിയത്. അതേ വിദ്യാലയത്തില്‍ നിന്ന് തന്നെയാണ് വിരമിച്ചതും. രാഷ്ട്ര തന്ത്രം, എഡ്യൂക്കേഷന്‍ ടെക്നോളജി,കൗണ്‍സിലിങ് സൈക്കോളജി എന്നിവയില്‍ ബിരുദാനന്തര ബിരുദവും ഒട്ടേറെ പി.ജി ഡിപ്ലോമ,സര്‍ടിഫിക്കറ്റ് കോഴ്സുകളുംപൂര്‍ത്തിയാക്കിയ മാഷ് കൊാവിഡ് കാലത്ത് പോലും ബിരുദാനന്തര ബിരുദ വിദ്യാര്‍ത്ഥിയായിരുന്നു.ഇപ്പോള്‍ വിദേശ സര്‍വ്വകലാ ശാലയില്‍ നിന്നും ഗവേഷണ പഠനത്തിനുള്ള തയ്യാറെടുപ്പിലാണീ അധ്യാപക വിദ്യാര്‍ഥി. ഒരു സ്‌കൂള്‍ അധ്യാപകന് ചെന്നെത്താവുന്ന മേഖലകളില്ലാംഅദ്ദേഹം കഴിവും പ്രാഗല്‍ഭ്യവും തെളിയിച്ചിട്ടുണ്ട്.മേപ്പയൂര്‍ സലഫി അധ്യാപക പരിശീലന കേന്ദ്രത്തില്‍ ടീച്ചര്‍ എഡ്യൂക്കേറ്ററായാണ് ഇപ്പോള്‍. മനഃശാസ്ത്ര കൗണ്‍സിലിംഗ് രംഗത്തും സജീവമാണ്. സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എഡ്യൂക്കേഷന്‍ ടെക്നോളജി എക്സിക്യൂട്ടീവ് അംഗമായി പ്രവര്‍ത്തിച്ചപ്പോള്‍ പ്രവേശന പരീക്ഷകള്‍ക്ക് 'ഈസി എന്‍ട്രന്‍സ്' കോച്ചിംഗ് പാക്കേജ്,സ്‌കൂള്‍ വിദ്യാര്‍ത്ഥികള്‍ക്കുള്ള ഓണ്‍ലൈന്‍ അഭിരുചിനിര്‍ണ്ണയ ടെസ്റ്റുകള്‍, എഡ്യൂ പോര്‍ട്ടല്‍ തുടങ്ങിയ പദ്ധതികള്‍ നടപ്പിലാക്കുന്ന ഉപസമിതികള്‍ക്ക് നേതൃത്വം നല്‍കിയത് ഹമീദ് മാഷായിരുന്നു. പ്രൈമറി, സെക്കന്ററി പാഠ പുസ്തക രചനാ സമിതികളിലുംഅദ്ദേഹം കഴിവ് തെളിയിച്ചു. വിദ്യാഭ്യാസ വകുപ്പില്‍ സ്റ്റേറ്റ് ഫോക്കസ് ഗ്രൂപ്പ് അംഗം,ഒ എസ് എസ് (തത്സമയ പിന്തുണാ ടീം ), സ്റ്റേറ്റ് -ജില്ലാ റിസോഴ്സ് ഗ്രൂപ്പ് അംഗം,സാമൂഹ്യ ശാസത്ര മേള വിധി വിധികര്‍ത്താക്കളുടെ പാനല്‍ എന്നിങ്ങനെ ഒട്ടേറെ അക്കാദമിക് സമിതികളിലും സേവനമുദ്ര പതിപ്പിച്ചിട്ടുണ്ട്. ഹജ്ജ് ട്രൈനര്‍ ആയി പലതവണ സേവനമനുഷ്ഠിച്ചിട്ടുണ്ട്.മുയിപ്പോത്ത് സ്വദേശിയായ ഹമീദ് മാഷ് പ്രദേശത്തെ ജീവകാരുണ്യമഹല്ല് സംരംഭങ്ങള്‍ക്കും നേതൃപരമായ പങ്കു വഹിക്കുന്നു. മര്‍ഹൂം വി. അബ്ദുല്ല ഉമരിയുടെ മകനാണ് ഹമീദ്.ഖദീജയാണ് മാതാവ്. അയനിക്കാട് എം.എല്‍.പി സ്‌കൂള്‍ അധ്യാപിക ജമീലയാണ് ഭാര്യ. ജവാദ് ഐ.ബി.എം ബംഗളൂരു,അമല്‍ ജുമാന്‍ ദുബൈ, റഷ അമന്‍ ജാമിഅഃ മില്ലിയ ഡല്‍ഹി എന്നിവര്‍ മക്കളാണ്.