റിയാദ്: സഊദി പബ്ലിക് ഹെൽത്ത് അതോറിറ്റി "വിഖായ" യെ സഊദി അറേബ്യയിലെ ഇൻഫ്ലുവൻസ ദേശീയ കേന്ദ്രമായി ലോകാരോഗ്യ സംഘടന (ഡബ്ല്യുഎച്ച്ഒ) അംഗീകരിച്ചു. വിഖായയുടെ പബ്ലിക് ഹെൽത്ത് ലബോറട്ടറികളുടെ വിലയിരുത്തൽ ഫലങ്ങളെ അടിസ്ഥാനമാക്കിയാണ് ഈ അംഗീകാരം.

എല്ലാ അംഗീകാര മാനദണ്ഡങ്ങളും മറ്റു ആവശ്യകതകളും പാലിക്കുന്നുണ്ടെന്ന് ഉറപ്പുവരുത്തുന്നതിനൊപ്പം ഗുണനിലവാരം, ആരോഗ്യ സുരക്ഷ, ജൈവസുരക്ഷ എന്നിവയുമായി ബന്ധപ്പെട്ട ആവശ്യകതകളും മൂല്യനിർണ്ണയത്തിൽ ഉൾപ്പെടുത്തിയിട്ടുണ്ട്. അതോറിറ്റിയുടെ ലബോറട്ടറികളിലെ ഉയർന്ന ഗുണ നിലവാരത്തോടൊപ്പം ലോകാരോഗ്യ സംഘടനയ്ക്ക് സമർപ്പിച്ച ഇൻഫ്ലുവൻസ നിരീക്ഷണ ഡാറ്റയുമായി ബന്ധപ്പെട്ട റിപ്പോർട്ടുകളും പരിഗണിച്ചാണ് ഈ നടപടി.

ഇൻഫ്ലുവൻസ വൈറസുകൾക്കും മറ്റ് ശ്വാസകോശ രോഗങ്ങൾക്കും വേണ്ടിയുള്ള എപ്പിഡെമിയോളജിക്കൽ നിരീക്ഷണ പ്രവർത്തനങ്ങൾ ഉൾപ്പെടുന്ന സമഗ്രമായ ഒരു നിരീക്ഷണ സംവിധാനം അടിസ്ഥാനമാക്കി വിഖായയുടെ പബ്ലിക് ഹെൽത്ത് ലബോറട്ടറികൾ ദേശീയ കേന്ദ്രമായാണ് പ്രവർത്തിക്കുന്നത്.