തിരുവനന്തപുരം: കഴിഞ്ഞ നാലു വര്‍ഷത്തിനിടയില്‍ വിവിധ പദ്ധതികളിലായി സ്ത്രീകളുമായി ബന്ധപ്പെട്ട 1738 ബോധവല്‍ക്കരണ പരിപാടികള്‍ മാത്രമാണ് സംഘടിപ്പിച്ചതെന്ന് കേരള വനിതാ കമ്മിഷന്‍. സ്ത്രീകള്‍ക്കെതിരെയുള്ള അതിക്രമങ്ങള്‍ വാര്‍ത്തയായ സാഹചര്യത്തിലാണ് ഇതുവരെ നടത്തിയ ബോധവല്‍ക്കരണത്തിന്റെ കണക്കുമായി കമ്മിഷന്‍ രംഗത്തു വന്നിരിക്കുന്നത്. ഓരോ വര്‍ഷവും പതിനായിരത്തിലേറെ പേര്‍ ബോധവല്‍ക്കരണ പരിപാടികളില്‍ പങ്കാളികളാകുന്നുണ്ടെന്നാണ് കമ്മിഷന്റെ അവകാശ വാദം. സെമിനാറുകള്‍, ജാഗ്രതാ സമിതി പരിശീലനം, വിവാഹ പൂര്‍വ കൗണ്‍സലിങ്, കലാലയജ്യോതി തുടങ്ങിയ വ്യത്യസ്ത പദ്ധതികളിലൂടെയാണ് ബോധവല്‍ക്കരണം സംഘടിപ്പിക്കുന്നത്.

നാലു വര്‍ഷത്തിനിടെ ആകെ 594 സെമിനാറുകളാണ് നടത്തിയത്. 91 വിവാഹപൂര്‍വ കൗണ്‍സലിങും 137 ജാഗ്രതാ സമിതി പരിശീലനങ്ങളും 916 കലാലയജ്യോതി പരിപാടികളും മാത്രമാണ് സംഘടിപ്പിച്ചത്. 2017-18 വര്‍ഷത്തില്‍ 146 സെമിനാറും 2018-19 വര്‍ഷത്തില്‍ 180 സെമിനാറുമാണ് സംഘടിപ്പിച്ചത്. 2020-21 വര്‍ഷത്തില്‍ കൊവിഡ് സാഹചര്യമായതിനാലാണ് കൂടുതല്‍ ബോധവല്‍ക്കരണ പരിപാടികള്‍ നടത്താതിരുന്നതെന്നും കമ്മിഷന്‍ വിശദീകരിക്കുന്നു. അതേസമയം കമ്മിഷന്റെ പ്രവര്‍ത്തനങ്ങള്‍ കഴിഞ്ഞ നാലു വര്‍ഷം ബോധവല്‍ക്കരണത്തില്‍ മാത്രമൊതുങ്ങിയെന്ന ആരോപണമുയര്‍ന്നിരുന്നു. പരാതികളില്‍ ഭൂരിഭാഗവും പരിഹാരം കാണാത്തതും വിമര്‍ശനത്തിനിടയാക്കിയിരുന്നു.