ലണ്ടന്‍: യൂറോകപ്പില്‍ നിന്ന് ജര്‍മനി പുറത്ത്. ഇന്നലെ നടന്ന പ്രീക്വാര്‍ട്ടറില്‍ എതിരില്ലാത്ത രണ്ട് ഗോളിന് പരാജയപ്പെടുത്തി ഇംഗ്ലണ്ടാണ് ജര്‍മനിക്ക് പുറത്തേക്കുള്ള വഴി കാണിച്ചത്.

വിജയം അനിവാര്യമായതിനാല്‍ ഇരു ടീമുകളും മികച്ച നീക്കവുമായി കരുതലോടെയായിരുന്നു കളിച്ചത്. പ്രതിരോധത്തില്‍ വീഴ്ച വരാതെ നോക്കിയതോടെ ആദ്യ പകുതിയില്‍ ഇരു ടീമുകള്‍ക്കും ഗോളൊന്നും നേടാന്‍ കഴിഞ്ഞില്ല. രണ്ടാം പകുതിക്ക് ശേഷമായിരുന്നു രണ്ട് ഗോളുകളും പിറന്നത്. മികച്ച മുന്നേറ്റത്തിനൊടുവില്‍ റഹീം സ്റ്റെര്‍ലിങാണ് ഇംഗ്ലണ്ടിന് വേണ്ടി ആദ്യ ഗോള്‍ സ്വന്തമാക്കിയത്. ഒരു ഗോളിന്റെ ലീഡ് നേടിയതോടെ ആത്മവിശ്വാസം നേടിയ ഇംഗ്ലണ്ട് കരുതലോടെ കളിച്ചു. സമനില ഗോളിനായി ജര്‍മനി ഇംഗ്ലണ്ട് ഗോള്‍ മുഖം ആക്രമിച്ച് കൊണ്ടിരുന്നെങ്കിലും ഇംഗ്ലണ്ട് പ്രതിരോധം ശക്തിപ്പെടുത്തി. സമനില ഗോളിനായുള്ള ശ്രമങ്ങള്‍ക്കിടെ ജര്‍മനിയുടെ വലയില്‍ രണ്ടാമതും പന്തെത്തി. 86ാം മിനുട്ടില്‍ ഹാരി കെയിനാണ് ഇംഗ്ലണ്ടിന്റെ രണ്ടാം ഗോള്‍ സ്വന്തമാക്കിയത്. ഗോള്‍ മടക്കാനായി ജര്‍മനി അവസാനംവരെ പൊരുതി നോക്കിയെങ്കിലും രക്ഷയുണ്ടായില്ല. ആധികാരിക ജയവുമായി ഇംഗ്ലീഷ് സംഘം യൂറോകപ്പിന്റെ ക്വാര്‍ട്ടര്‍ ഫൈനലില്‍ പ്രവേശിച്ചു.