തിരുവനന്തപുരം: കേരള എന്‍ജിനീയറിങ്, ഫാര്‍മസി പ്രവേശന പരീക്ഷ റാങ്ക് പട്ടിക പ്രസിദ്ധീകരിച്ചു. 77,005 വിദ്യാര്‍ഥികള്‍ എഴുതിയ എന്‍ജിനീയറിങ് പ്രവേശന പരീക്ഷയില്‍ 58,870 പേര്‍ യോഗ്യത നേടിയതായും 50,858 പേര്‍ റാങ്ക് പട്ടികയില്‍ ഇടംപിടിച്ചതായും ഉന്നതവിദ്യാഭ്യാസ മന്ത്രി ആര്‍ ബിന്ദു അറിയിച്ചു. ഇടുക്കി സ്വദേശിയായ വിശ്വനാഥ് വിനോദ്‌ ഒന്നാം റാങ്കും
തിരുവനന്തപുരം സ്വദേശി തോമസ് ബിജു രണ്ടാം റാങ്കും സ്വന്തമാക്കി. കൊല്ലം സ്വദേശി നവജോത് കൃഷ്ണന്‍, തൃശൂര്‍ സ്വദേശി ആന്‍ മേരി എന്നിവര്‍ക്കാണ് മൂന്നും നാലും റാങ്കുകള്‍. സംസ്ഥാന സിലബസില്‍ നിന്നുള്ള 2215 പേരാണ് ആദ്യ അയ്യായിരം റാങ്കില്‍ ഉള്ളത്. 2568 പേര്‍ കേന്ദ്ര സിലബസില്‍ നിന്നും ഉള്ളവരാണ്. 343 കേന്ദ്രങ്ങളിലായി ജൂലൈ നാലിനാണ് പരീക്ഷ നടത്തിയത്.