ഗ്ലാസ്‌ഗോ: യൂറോ കപ്പിന്റെ പ്രീ ക്വാര്‍ട്ടര്‍ മത്സരത്തില്‍ ഇഞ്ചുറിയേറ്റ സ്വീഡന്‍ ടൂര്‍ണമെന്റില്‍ നിന്ന് പുറത്തായി. കഴിഞ്ഞ ദിവസം നടന്ന അവസാന പ്രീ ക്വാര്‍ട്ടര്‍ പോരാട്ടത്തില്‍ ഇഞ്ചുറി ടൈമില്‍ ഗോള്‍ നേടിയാണ് ഉക്രൈന്‍ സ്വീഡനെ പരാജയപ്പെടുത്തിയത്. ഗ്രൂപ്പ് ഘട്ടത്തില്‍ സ്‌പെയിനിനെ ഗോള്‍ രഹിത സമനിലയില്‍ തളച്ചെത്തിയ സ്വീഡന് ഉക്രൈന് മുന്നില്‍ അടിപതറുകയായിരുന്നു. 917 പാസുമായി യൂറോയില്‍ റെക്കോര്‍ഡ് പാസ് പൂര്‍ത്തിയാക്കിയ സ്‌പെയിനിനെയായിരുന്നു ഗ്രൂപ്പ് ഘട്ട മത്സരത്തില്‍ സ്വീഡന്‍ സമനിലയില്‍ തളച്ചത്. പിന്നീട് സ്‌ലോവേനിയയേയും പോളണ്ടിനെയും പരാജയപ്പെടുത്തി പ്രീ ക്വാര്‍ട്ടറിലേക്ക് ടിക്കറ്റെടുത്തു. ഉക്രൈനെതിരേ നടന്ന പ്രീ ക്വാര്‍ട്ടര്‍ മത്സരം പതുക്കെയാണ് തുടങ്ങിയത്.

ചെറിയ ഒരു പാളിച്ചയും വരാതെ നോക്കിയെങ്കിലും 27ാം മിനുട്ടില്‍ സ്വീഡിഷ് പ്രതിരോധം മറികടന്ന് ഉക്രൈന്‍ ഗോള്‍ സ്വന്തമാക്കി. ഒലക്‌സാന്ദ്രെ സിന്‍ചെങ്കോയായിരുന്നു ഉക്രൈന് വേണ്ടി ആദ്യ ഗോള്‍ നേടിയത്. സമനില ഗോളിനായി പൊരുതിയ സ്വീഡന്‍ ഒടുവില്‍ ലക്ഷ്യം കണ്ടു. 43ാം മിനുട്ടില്‍ എമില്‍ ഫോര്‍സ്ബര്‍ഗിലൂടെ സ്വീഡന്‍ ഗോള്‍ മടക്കി സമനില കണ്ടെത്തി. പിന്നീട് വിജയ ഗോളിനായി ഇരു ടീമുകളും പൊരുതിക്കളിച്ചെങ്കിലും ഫലമുണ്ടായില്ല. ഇതോടെ മത്സരം അധിക സമയത്തേക്ക് നീണ്ടു. മത്സരം പുരോഗമിക്കുന്നതിനിടെ 99ാം മിനുട്ടില്‍ സ്വീഡിഷ് താരം മാര്‍ക്കസ് ഡാനില്‍സണ് ചുവപ്പ് കാര്‍ഡ് ലഭിച്ചു. ഇതോടെ സ്വീഡന്റെ പദ്ധതികള്‍ തെറ്റിത്തുടങ്ങി. മത്സരത്തിന്റെ റഗുലര്‍ സമയം പൂര്‍ത്തിയായി പെനാല്‍റ്റിയിലേക്ക് നീങ്ങാനുള്ള ഒരുക്കത്തിനിടെയായിരുന്നു ഉക്രൈന്‍ സ്വീഡന് ഷോക്കേല്‍പിച്ചുകൊണ്ട് പന്ത് വലയിലെത്തിച്ചത്. ഇതോടെ യൂറോയുടെ ക്വാര്‍ട്ടര്‍ ഉറപ്പിച്ച ഉക്രൈന്‍ ആഘോഷം തുടങ്ങിയിരുന്നു. ക്വാര്‍ട്ടര്‍ ഫൈനലില്‍ ഇംഗ്ലണ്ടാണ് ഉക്രൈന്റെ എതിരാളികള്‍. ചിരവൈരികളായ ഇംഗ്ലണ്ടും ഉക്രൈനും തമ്മില്‍ ക്വാര്‍ട്ടര്‍ പോരാട്ടത്തില്‍ കൊമ്പുകോര്‍ക്കുമ്പോള്‍ മികച്ചൊരു മത്സരം തന്നെ റോമിലെ ഒളിംപിക് സ്റ്റേഡിയത്തില്‍ പ്രതീക്ഷിക്കാം.