സെന്റ് പീറ്റേഴ്‌സ്ബര്‍ഗ്: അവസാന മിനുട്ടു വരെ പൊരുതിയ സ്വിറ്റ്‌സര്‍ലന്‍ഡ് യൂറോ കപ്പില്‍നിന്ന് പുറത്ത്. ഇന്നലെ നടന്ന മത്സരത്തില്‍ സ്‌പെയിനാണ് സ്വിറ്റ്‌സര്‍ലന്‍ഡിനെ പരാജയപ്പെടുത്തിയത്. നാടകീയത നിറഞ്ഞ മത്സരത്തിന്റെ അവസാന നിമിഷംവരെ സ്‌പെയിനിനെ പൂട്ടിക്കെട്ടിയ സ്വിറ്റ്‌സര്‍ലന്‍ഡ് പെനാല്‍റ്റിയിലാണ് തോല്‍വി സമ്മതിച്ചത്.

എട്ടാം മിനുട്ടില്‍ സ്വിറ്റ്‌സര്‍ലന്‍ഡിന്റെ സെല്‍ഫ് ഗോളില്‍ സ്‌പെയിന്‍ മുന്നിലെത്തി. 68ാം മിനുട്ടില്‍ ഷെര്‍ദാന്‍ ഷാക്കിരിയുടെ ഗോളില്‍ സ്വിസ് പട സമനില പിടിച്ചു. എന്നാല്‍, 77ാം മിനട്ടില്‍ സ്വിസ് താരം റെമോ ഫ്രോലര്‍ ചുവപ്പ് കാര്‍ഡ് കണ്ട് പുറത്തായതോടെ സ്വിസ് ടീം പത്തു പേരായി ചുരുങ്ങി.
പത്തു പേരായി ചുരുങ്ങിയെങ്കിലും കീഴടങ്ങാന്‍ തയാറാകാതിരുന്ന സ്വിറ്റ്‌സര്‍ലന്‍ഡ് അധിക സമയത്തും പ്രതിരോധിച്ചു നിന്നു. ഇതോടെ മത്സരം പെനാല്‍റ്റിയിലേക്ക് നീണ്ടു. പെനാല്‍റ്റിയില്‍ 3 - 1 എന്ന സ്‌കോറിന് സ്‌പെയിന്‍ ജയം സ്വന്തമാക്കിയാണ് യൂറോകപ്പിന്റെ സെമി ഫൈനലിലേക്ക് മുന്നേറിയത്.

അതേ സമയം യൂറോ കപ്പില്‍ രണ്ടാമത്തെ ക്വാര്‍ട്ടര്‍ ഫൈനല്‍ പോരാട്ടത്തില്‍  ബെല്‍ജിയത്തെ പരാജയപ്പെടുത്തി  ഇറ്റലി സെമി ഫൈനലില്‍ കടന്നു. നിക്കോളോ ബറേലോ (31ാം മിനിറ്റ്), ലോറെന്‍സോ ഇന്‍സിനി (44) എന്നിവരായിരുന്നു ഇറ്റലിക്ക് വേണ്ടി ഗോളടിച്ചത്. 45ാം മിനിറ്റില്‍ ലഭിച്ച പെനല്‍റ്റിയിലൂടെ ലുക്കാക്കു ബെല്‍ജിയത്തിന് വേണ്ടി ഒരു ഗോള്‍ സ്‌കോര്‍ ചെയ്തു. സെമിയില്‍ സ്‌പെയിനാണ് ഇറ്റലിയുടെ എതിരാളികള്‍.