തെരുവു നായ കടിച്ചാല്‍ നഷ്ടപരിഹാരം ലഭിക്കാന്‍ കേരളത്തില്‍ മാര്‍ഗമുണ്ടെന്ന കാര്യം എത്ര പേര്‍ക്കറിയാം. 2016 ഏപ്രില്‍ 5 ന് ജസ്റ്റിസ് സിരി ജഗന്‍ കമ്മിറ്റിയെ ഇക്കാര്യത്തിനായി സുപ്രീം കോടതി നിശ്ചയിച്ചിട്ടുണ്ട്.എറണാകുളം നോര്‍ത്തിലുള്ള കോര്‍പ്പറേഷന്‍ കെട്ടിടത്തില്‍ കഴിഞ്ഞ ആറ് വര്‍ഷമായി കമ്മിറ്റി പ്രവര്‍ത്തിക്കുന്നുണ്ട്. സംസ്ഥാനത്ത് തെരുവുനായ കടിയേല്‍ക്കുന്നവര്‍ പരാതിയുമായി സമീപിച്ചാല്‍ ആ പരാതി പരിശോധിച്ച് ആവശ്യമായ നഷ്ടപരിഹാരം നിശ്ചയിച്ച് പണം നല്‍കാനുള്ള നിര്‍ദ്ദേശം സര്‍ക്കാറിന് നല്‍കുകയാണ് കമ്മിറ്റി ചെയ്യേണ്ടത്. പരിക്കിന്റെ ആഴം, പരിക്കേറ്റവരുടെ പ്രായം, ജോലി ചെയ്യാന്‍ കഴിയാത്ത ദിവസങ്ങള്‍, അംഗവൈകല്യം സംഭവിക്കുക, ശരീരഭാഗങ്ങള്‍ വികൃതമാകുക തുടങ്ങി കാര്യങ്ങളെല്ലാം പരിഗണിച്ചാണ് നഷ്ടപരിഹാര തുക കമ്മിറ്റി നിശ്ചയിക്കുക.വെള്ളക്കടലാസില്‍ അപേക്ഷ തയ്യാറാക്കി കൊച്ചി ഓഫീസില്‍ എത്തിക്കുക മാത്രമാണ് ചെയ്യേണ്ടത്. പരാതിക്കാരന്‍ ഒരു തവണ കമ്മിറ്റിക്ക് മുന്നില്‍ ഹിയറിംഗിനായി ഹാജരാകണം. അഭിഭാഷകന്റെ സാന്നിധ്യം ആവശ്യമില്ല. കമ്മിറ്റിയുടെ വിലാസം: ജസ്റ്റിസ് സിരി ജഗന്‍ കമ്മിറ്റി, കൊച്ചി കോര്‍പ്പറേഷന്‍ ബില്‍ഡിംഗ്, എറണാകുളം നോര്‍ത്ത്.