റഫീഖ് റമദാൻ
കോഴിക്കോട് • ഓണത്തോടനുബന്ധിച്ച് റേഷൻ കടകളിലൂടെ സർക്കാർ വിതരണം ചെയ്ത കിറ്റുകൾ കൈപ്പറ്റാതിരുന്നവരിൽ കൂപ്പൺ ലഭിച്ചിട്ടുള്ളവർക്ക് സപ്ലൈകോ ഔട്ട്‌ലെറ്റുകൾ വഴി ഇവ ലഭിക്കും. ബാക്കിവന്ന കിറ്റുകൾ ഇന്നലെയോടെ തിരിച്ചെടുക്കാൻ സിവിൽ സപ്ലൈസ് കമ്മിഷണർ ഡോ. സജിത് ബാബു സപ്ലൈകോയ്ക്ക് നിർദേശം നൽകിയിരുന്നു.
ഇന്നലെ അഞ്ചുമണിയോടെ കിറ്റുകൾ സമീപത്തെ സപ്ലൈകോ ഔട്ട്‌ലെറ്റുകളിലേക്ക് മാറ്റണമെന്നാണ് നിർദേശിച്ചിരുന്നത്. കിറ്റുകൾ കൊണ്ടുപോയതായി റേഷൻ വ്യാപാരികളും സ്ഥിരീകരിച്ചു. അതോടൊപ്പം ഏഴാം തീയതിയോടെ കിറ്റ് വിതരണം പൂർത്തിയാക്കാൻ നിർദേശിച്ചിട്ടും എങ്ങനെയാണ് ഇത്രയും കൂപ്പണുകൾ വന്നതെന്ന് വിശദീകരണം നൽകാൻ റേഷനിങ് ഇൻസ്‌പെക്ടർമാരോടും പി.എസ്.ഒമാരോടും ആവശ്യപ്പെട്ടിട്ടുണ്ട്.

കിറ്റിന് ടോക്കൺ ലഭിച്ചവരുണ്ടെങ്കിൽ മാവേലി സ്റ്റോറുകൾ ഉൾപ്പെടെയുള്ള സപ്ലൈകോ ഔട്ട്‌ലെറ്റുകളിൽ നിന്നോ താലൂക്ക് സപ്ലൈ ഓഫിസിൽ നിന്നോ കൈപ്പറ്റാം. ഇക്കാര്യം ഉറപ്പാക്കാൻ ടി.എസ്.ഒമാർക്കും ഡി.എസ്.ഒമാർക്കും സിവിൽ സപ്ലൈസ് കമ്മിഷണർ കർശന നിർദേശം നൽകിയിട്ടുണ്ട്. കൂപ്പണുള്ളവർക്ക് കിറ്റ് നൽകിയ ശേഷം ബാക്കിവരുന്ന കിറ്റുകളിലെ വസ്തുക്കൾ സപ്ലൈകോയ്ക്ക് ലഭിക്കും. കിറ്റുകൾ ഒരുക്കാനായി 400 കോടി രൂപയാണ് സർക്കാർ സപ്ലൈകോയ്ക്ക് അനുവദിച്ചിരുന്നത്.

സെർവർ-നെറ്റ് തകരാറുകൾ മൂലം പലയിടത്തും കിറ്റ് വിതരണം വൈകുകയും ആളുകൾ ഇത് കൈപ്പറ്റാനാകാതെ മടങ്ങുകയും ചെയ്തിരുന്നു. ഇത്തരക്കാർക്കാണ് കൂപ്പൺ നൽകിയിരുന്നത്.
92 ലക്ഷം റേഷൻ കാർഡ് ഉടമകൾക്കായി 87 ലക്ഷം കിറ്റുകളാണ് സപ്ലൈകോ വഴി റേഷൻകടകളിലെത്തിച്ചത്. ആദ്യം 85.56 ലക്ഷം കിറ്റുകളാണ് കൊണ്ടുവന്നത്. പിന്നീട് പലർക്കും കിറ്റ് കിട്ടിയില്ലെന്ന പരാതി വന്നതോടെ കൂടുതൽ എത്തിച്ചു. ഏഴാം തീയതി രാത്രി എട്ടുമണിയോടെ വിതരണം പൂർത്തിയാക്കണമെന്ന് ഭക്ഷ്യ-സിവിൽ സപ്ലൈസ് മന്ത്രി നിർദേശം നൽകിയിരുന്നു. എന്നാൽ ആറരലക്ഷം കാർഡുടമകൾക്ക് കിറ്റ് ലഭിച്ചില്ല. ഏഴാം തീയതിക്കു ശേഷം റേഷൻകടകൾ വഴി കിറ്റ് നൽകരുതെന്നും നിർദേശിച്ചിരുന്നു. സോഫ്റ്റ്‌വെയറിലും ഇതിനനുസരിച്ചുള്ള ക്രമീകരണം നടത്തിയിരുന്നു.
ഓഗസ്റ്റ് 23 മുതൽ മഞ്ഞ, പിങ്ക്, നീല, വെള്ള, വിഭാഗം കാർഡുകാരുടെ ക്രമത്തിൽ മൂന്ന് ദിവസം ഇടവിട്ടുകൊണ്ടുള്ള വിതരണ ഷെഡ്യൂൾ സെപ്റ്റംബർ മൂന്നിന് അവസാനിക്കുന്ന വിധത്തിലാണ് ക്രമീകരിച്ചിരുന്നത്. ഈ ദിവസങ്ങളിൽ കിറ്റുകൾ കൈപ്പറ്റാത്തവർക്ക് സെപ്റ്റംബർ ഏഴ് വരെ സമയം നീട്ടിക്കൊടുത്തെങ്കിലും ഓരോ വിഭാഗം കാർഡുകാർക്കും നിശ്ചിത തീയതിക്കകം കിറ്റുകൾ എത്തിയില്ല. കിറ്റുകൾ ഉള്ള പല കടകളിലും നെറ്റ്-സെർവർ തകരാറുകൾ വില്ലനായി മാറുകയും ചെയ്തു.

തിരുവോണനാളിൽ ഒന്നേകാൽ ലക്ഷം കിറ്റുകൾ റേഷൻകടകളിൽ ബാക്കിയായെന്നത് ശരിയല്ലെന്നാണ് കടക്കാർ പറയുന്നത്. ഓരോ താലൂക്കിലും വിവിധ കടകളിലെ ഇ-പോസ് മെഷീനിലൂടെ 50-100 കിറ്റുകൾ ആയി 1500 കിറ്റുകൾ സ്റ്റോക്കിൽ ചേർക്കുകയാണുണ്ടായതെന്നാണ് അവർ പറയുന്നത്. സാങ്കേതിക പിശകുമൂലമാണിതെന്നായിരുന്നു ഉന്നത ഉദ്യോഗസ്ഥരുടെ വിശദീകരണം. ഫലത്തിൽ മുക്കാൽ ലക്ഷത്തോളം ഇല്ലാ കിറ്റുകളാണ് ഇത്തരത്തിൽ സ്റ്റോക്കിൽ വന്നത്.