കല്‍പ്പറ്റ: ഇസ്‌ലാം ഒരുവിധത്തിലുള്ള തീവ്രവാദത്തെയും അംഗീകരിക്കുന്നില്ലെന്ന് സമസ്ത ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍ പറഞ്ഞു. ഐ.എസ്, സലഫിസം, ഫാസിസം എന്ന പ്രമേയത്തില്‍ നടക്കുന്ന എസ്.വൈ.എസ് ത്രൈമാസ കാംപയിനിന്റെ ഭാഗമായി സംഘടിപ്പിച്ച ജില്ലാ ആദര്‍ശ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
 പാരമ്പര്യമായി കൈമാറി പോന്ന മതാചാരങ്ങളെയും ആരാധനകളെയും ദുര്‍വ്യാഖ്യാനിക്കുകയും വികൃതമാക്കുകയും ചെയ്തവര്‍ മതബോധമില്ലാത്ത അഭ്യസ്തവിദ്യരെ വലയിലാക്കിയതിന്റെ ഉദാഹരണമാണ് അടുത്തകാലത്ത് ഉയര്‍ന്നുകേട്ട തീവ്രവാദബന്ധ വാര്‍ത്തകളെന്നും അദ്ദേഹം കൂട്ടിച്ചേര്‍ത്തു. മഹല്ല് തലങ്ങളില്‍ ശക്തമായ ബോധവല്‍ക്കരണത്തിലൂടെ പുതുതലമുറയെ യഥാര്‍ഥ വിശ്വാസികളാക്കി മാറ്റലാണ് ഇതിനുള്ള പരിഹാരമെന്നും കെ.ടി ഹംസ മുസ്‌ലിയാര്‍ പറഞ്ഞു. ഇബ്രാഹിം ഫൈസി പേരാല്‍ അധ്യക്ഷനായി.
മഹല്ല് കമ്മിറ്റികളില്‍ നുഴഞ്ഞ്കയറി സമാധാനപരമായി നടന്നു വരുന്ന മഹല്ലുകളെ ശിഥിലാമക്കാന്‍ ശ്രമിക്കുന്നവര്‍ക്കെതിരേ സമുദായം ജാഗ്രത പാലിക്കണമെന്ന് സംഗമം ആവശ്യപ്പെട്ടു.
പിണങ്ങോട് അബുബക്കര്‍ പ്രമേയ പ്രഭാക്ഷണം നടത്തി. എം.എം ഇബിച്ചിക്കോയ മുസ്‌ലിയാര്‍, എസ് മുഹമ്മദ് ദാരിമി, ടി.സി അലി മുസ്‌ലിയാര്‍, ആനമങ്ങാട് അബുബക്കര്‍ മുസ്‌ലിയാര്‍, ഇബ്രാഹിം ഫൈസി വാളാട് സംബന്ധിച്ചു. ഷംസുദ്ദീന്‍ റഹിമാനി സ്വാഗതവും മഹമ്മദ് കുട്ടി ഹസനി നന്ദിയും പറഞ്ഞു.