ഗൂഡല്ലൂര്‍: സഞ്ചാരികളും നാട്ടുകാരും ആശ്രയിക്കുന്ന ഊട്ടി പര്‍വത ട്രെയിന്‍ പാതി വഴിയില്‍ പണിമുടക്കുന്നത് പതിവാകുന്നു. കഴിഞ്ഞ ദിവസം മേട്ടുപാളയത്ത് നിന്ന് രാവിലെ 7.10ന് ഊട്ടിയിലേക്ക് പുറപ്പെട്ട ട്രെയിന്‍ മൂന്നിടങ്ങളിലാണ് എന്‍ജിന്‍ തകരാറു കാരണം യാത്രക്കാരെ വലച്ച് ഓട്ടം നിര്‍ത്തിയത്.
ആടര്‍ലി, ഹില്‍ഗ്രോ, റണ്ണിമേട് എന്നീ സ്ഥലങ്ങളിലാണ് എന്‍ജിന്‍ തകരാറുകാരണം കഴിഞ്ഞ ദിവസം ട്രെയിന്‍ നിന്നത്. 210 യാത്രക്കാരാണ് ട്രെയിനിലുണ്ടായിരുന്നത്. പിന്നീട് അറ്റകുറ്റപ്പണി നടത്തി രണ്ടു മണിക്കൂര്‍ വൈകിയാണ് ട്രെയിന്‍ ഓടിയത്. ട്രെയിന്‍ പാതിവഴിയില്‍ കേടാകുന്നതിന് ശാശ്വത പരിഹാരം കാണണമെന്ന് യാത്രക്കാര്‍ ആവശ്യപ്പെട്ടു. ഇതിനകം സെപ്റ്റംബര്‍ 27 വരെയുള്ള ടിക്കറ്റ് ബുക്കിങ് പൂര്‍ത്തിയായിട്ടുണ്ട്. അധികൃതരുടെ നടപടിയില്‍ പ്രതിഷേധം ശക്തമാണ്.