തൊടുപുഴ • ഭർതൃവീട്ടിൽ 28 കാരി ജീവനൊടുക്കിയ കേസിൽ ഭർത്താവ് അറസ്റ്റിൽ. ഉപ്പുതറ വളകോട് പുത്തൻവീട്ടിൽ ജോബിഷി(35) നെയാണ് പീരുമേട് ഡിവൈ.എസ്.പി ജെ. കുര്യാക്കോസിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്. സ്ത്രീധന പീഡനത്തെ തുടർന്നാണ് ആത്മഹത്യയെന്ന് കണ്ടെത്തിയതിനെ തുടർന്നാണ് അറസ്റ്റ്. കേസിൽ ജോബിഷിന്റെ മാതാപിതാക്കളെയും ഉടൻ അറസ്റ്റ് ചെയ്‌തേക്കും.
ഏലപ്പാറ ഹെലിബറിയ സ്വദേശിനി എം.കെ ഷീജ കഴിഞ്ഞ ഒൻപതിനാണ് ഭത്താവിന്റെ വീട്ടിൽ ആത്മഹത്യ ചെയ്തത്. ബാക്കി സ്ത്രീധനത്തെ ചൊല്ലി ഭർത്താവ് ജോബിഷും മാതാപിതാക്കളും പീഡിപ്പിച്ചതാണ് അത്മഹത്യക്ക് കാരണമെന്ന് ഷീജയുടെ സഹോദരൻ അരുൺ ഉപ്പുതറ പൊലിസിൽ പരാതി നൽകിയിരുന്നു.

പത്തു മാസം മുമ്പായിരുന്നു ഇരുവരുടേയും വിവാഹം. ഒന്നര ലക്ഷം രൂപയും എട്ട് പവൻ സ്വർണവുമാണ് ആവശ്യപ്പെട്ടിരുന്നത്. പണവും ആറ് പവൻ സ്വർണവും ജോബിഷിന് കൈമാറി. ബാക്കിയുള്ള സ്വർണത്തെച്ചൊല്ലി ജോബിഷ് ശാരീരികമായി ഉപദ്രവിക്കുകയും മാനസികമായി പീഡിപ്പിക്കുകയും ചെയ്തിരുന്നതായാണ് കുടുംബം മൊഴി നൽകിയത്. അന്വേഷണത്തിൽ ഇത് സ്ഥിരീകരിക്കുകയും ചെയ്തതായി പൊലിസ് പറയുന്നു. ഷീജക്ക് നൽകിയ സ്വർണത്തിൽ ഒരു ഭാഗം ഉപ്പുതറയിലെ സ്വകാര്യ പണമിടപാട് സ്ഥാപനത്തിൽ ജോബിഷ് പണയം വച്ചിരുന്നു. ഇത് പൊലിസ് കണ്ടെടുത്തിട്ടുണ്ട്. ജോബിഷിന്റെ മാതാപിതാക്കളെയും കേസിൽ പ്രതി ചേർത്തതായാണ് സൂചന. കൂടുതൽ അന്വേഷണത്തിന് ശേഷം ഇവരെയും അറസ്റ്റ് ചെയ്യാനാണ് പൊലിസ് നീക്കം. പ്രതിയെ പീരുമേട് കോടതിയിൽ ഹാജരാക്കി റിമാൻഡ് ചെയ്തു.