ഇസ്മാഈൽ അരിമ്പ്ര

തമിഴകത്തിന്റെ മനസറിഞ്ഞ്, പ്രബോധന സംസ്കരണ രംഗത്ത് നവ ചലനം സൃഷ്ടിച്ച് സമസ്ത തമിഴ്നാട് സന്ദേശ യാത്രക്ക് തിരുപ്പൂരിൽ വരവേൽപ് . ആദർശ വിശുദ്ധിയുടെ നൂറാം വർഷത്തേക്ക് കാലെടുത്തു വെക്കുന്ന പണ്ഡിത സഭയുടെ സന്ദേശത്തെ വിളംബരം ചെയ്ത് സമസ്ത സെക്രട്ടറിമാരായ എം.ടി അബ്ദുല്ല മുസ്ലിയാർ, പി.പി ഉമർ മുസ്ലിയാർ, മുശാവറ അംഗം ആദൃശേരി ഹംസക്കുട്ടി മുസ്ലിയാർ, സയ്യിദ് സാബിഖലി ശിഹാബ് തങ്ങൾ എന്നിവരുടെ നേതൃത്വത്തിൽ ഇന്ന് രാവിലെ പത്ത് മണിക്കാണ് തിരുപ്പുരിൽ സമ്മേളനം തുടങ്ങിയത്.

പ്രവാചക പാരമ്പര്യത്തിന്റെ കണ്ണിമുറിയാത്ത താവഴിയും കേരള മുസ്ലിംകൾ പൈതൃകമായി തുടർന്നു സമസ്ത സ്വീകരിച്ച ആദർശ ശൈലിയും വിശദീകരിച്ചായിരുന്നു പ്രഭാഷണങ്ങൾ. മുസ്ലിം സമുദായത്തിന്റെ വിശ്വാസത്തിന് കാവൽ നിൽക്കുകയാണ് സമസ്തയുടെ പ്രവർത്തനമെന്ന് ഉദ്ഘാടന പ്രസംഗത്തിൽ സയ്യിദ് സാബിഖലി ശിഹാബ് തങ്ങൾ പറഞ്ഞു. വിദ്യാഭ്യാസ, സാമൂഹിക, ജീവകാരുണ്യ മേഖലകളിലെല്ലാം കേരള മുസ്ലിംകൾ നേടിയ മധുരം തമിഴ്നാട്ടിലേക്ക് കൂടി വ്യാപിപ്പിക്കുകയാണ് ലക്ഷ്യമെന്നും മദ്റസകൾ ,ദർസുകൾ, കോളേജുകൾ തുടങ്ങിയവയിലൂടെ കേരളം നേടിയ പുരോഗതി തമിഴിലേക്കും വ്യാപിപ്പിക്കണമെന്നും എം.ടി അബ്ദുല്ല മുസ്ലിയാർ വിശദീകരിച്ചു. ഉലമാക്കളും ഉമറാക്കളും സാധാരണക്കാരും സമസ്തയുടെ ഭാഗമാണെന്നും സന്ദേശ യാത്രയിലൂടെ കേരളവും തമിഴ് നാടും രണ്ടല്ല; ഒന്നാണെന്ന സന്ദേശം കൈമാറുകയാണെന്നും അദ്ദേഹം പറഞ്ഞു. ആദൃശേരി ഹംസക്കുട്ടി മുസ്ലിയാർ അറബിയിൽ നടത്തിയ ഉദ്ബോധന പ്രഭാഷണവും , പാരമ്പര്യ വഅള് രീതിയിൽ കൊയ്യോട് ഉമർ മുസ്ലിയാർ ഇസ്ലാമിക വ്യക്തിത്വവും സമസ്തയുടെ പ്രവർത്തനങ്ങളും മണമറഞ്ഞ സമസ്തയുടെ ഉന്നത നേതാക്കളെ പരിചയപ്പെടുത്തിയും നടത്തിയ പ്രഭാഷണവും തിരുപ്പൂരിലെ ജനത ആവേശപൂർവമാണ് വരവേറ്റത്.
അറബി, മലയാളം, തമിഴ് ഭാഷകളിലാണ് സന്ദേശ യാത്രയിലെ പ്രഭാഷണങ്ങൾ.
ഹാഫിസ് സൈനുൽ ആബിദീൻ മളാഹിരി, കൊടക് അബ്ദുറഹ്മാൻ മുസ്ലിയാർ, സൈദ് മുഹമ്മദ് തിരുപ്പൂർ തുടങ്ങിയവർ സംസാരിച്ചു. പുത്തനഴി മൊയ്തീൻ ഫൈസി, ഡോ.എൻ.എ.എം അബ്ദുൽ ഖാദിർ , അബ്ദുസമദ് പൂക്കോട്ടൂർ, കെ മോയിൻ കുട്ടി മാസ്റ്റർ തുടങ്ങിയവർ നേതൃത്വം നൽകി. സമ്മേളനത്തിന് ശേഷം തിരുപ്പൂരിലെ വിവിധ മസ്ജിദ്, മഹല്ല് കമ്മിറ്റി ഭാരവാഹികൾ, മത രംഗത്തെ സംഘാടകർ തുടങ്ങിയവർ സമസ്ത നേതാക്കൾക്കൊപ്പം ചർച്ച നടത്തി.