പെരിന്തല്‍മണ്ണ: കണ്ണൂരുകാരന്‍ മുഹമ്മദിനായി കൈകോര്‍ത്ത കേരളം ഇമ്രാന്‍ എന്ന ആറുമാസം മാത്രം പ്രായമായ തങ്ങളുടെ മകന് വേണ്ടിയും ഒത്തൊരുമിക്കുമെന്ന പ്രതീക്ഷയിലാണ് മലപ്പുറം പെരിന്തല്‍മണ്ണ സ്വദേശി ആരിഫും കുടുംബവും. മുഹമ്മദിനെ പോലെ 'സ്‌പൈനല്‍ മസ്‌കുലര്‍ അട്രോഫി' എന്ന അപൂര്‍വരോഗം ബാധിച്ചതിനാല്‍ 18 കോടി രൂപ വിലവരുന്ന മരുന്നെത്തിച്ചാല്‍ രക്ഷപ്പെടുത്താമെന്നാണ് ഡോക്ടര്‍മാര്‍ പറയുന്നത്.

സഹായത്തിനായി കുടുംബം നിരവധി വാതിലുകള്‍ മുട്ടിയെങ്കിലും നിരാശയായിരുന്നു ഫലം. ചികിത്സയ്ക്ക് പണം കണ്ടെത്താന്‍ സര്‍ക്കാരിനെ സമീപിച്ച പിതാവിന് നേരിടേണ്ടിവന്നത് അവഗണന മാത്രമായിരുന്നു. സര്‍ക്കാരില്‍നിന്ന് അനുകൂല നടപടി ലഭിക്കാതായതോടെ കുട്ടിക്ക് ചികിത്സ ലഭ്യമാക്കണമെന്നാവശ്യപ്പെട്ട് ഹൈക്കോടതിയെ സമീപിച്ചിരിക്കുകയാണ് കുടുംബം. പിതാവ് നല്‍കിയ ഹരജിയില്‍ കഴിഞ്ഞമാസം 28നകം എതിര്‍ സത്യവാങ്മൂലം സമര്‍പ്പിക്കാന്‍ സര്‍ക്കാരിനോട് കോടതി നിര്‍ദേശിച്ചിരുന്നു. എന്നാല്‍, ഇതിലും അനുകൂല നടപടിയുണ്ടായില്ല. ജനിച്ചുവീണ അന്ന് മുതല്‍ ആശുപത്രിക്കിടക്കയിലാണ് ഈ കുരുന്ന്. കോഴിക്കോട് മെഡിക്കല്‍ കോളജ് ആശുപത്രിയിലെ വെന്റിലേറ്ററിലാണ് നിലവില്‍ ഇമ്രാനുള്ളത്. ചികിത്സയ്ക്ക് പണം കണ്ടെത്തുന്നതിനായി മഞ്ഞളാംകുഴി അലി എം.എല്‍.എയുടെ നേതൃത്വത്തില്‍ നാട്ടുകാര്‍ കമ്മിറ്റി രൂപീകരിച്ചിട്ടുണ്ട്.

അക്കൗണ്ട് നമ്പര്‍- 16320100118821.

ഐ.എഫ്.എസ്.സി: FDRL0001632.

ഗൂഗിള്‍ പേ ഫോണ്‍ നമ്പര്‍: 8075393563.