റഫീഖ് റമദാൻ

കോഴിക്കോട് • വിലക്കയറ്റത്തിൽ ജനത്തിന് പൊള്ളുമ്പോഴും സാധാരണക്കാരന്റെ വിളയായ നാളികേരത്തിന്റെ വില കുത്തനെ താഴേക്ക്. കഴിഞ്ഞവർഷം കിലോഗ്രാമിന് 43 വരെ ഉയർന്ന വില ഇപ്പോൾ 23ലെത്തി നിൽക്കുകയാണ്.
ഒരു കിലോ തേങ്ങ ഉത്പ്പാദിപ്പിക്കാൻ കർഷകന് 50 രൂപയിലേറെ ചെലവു വരുമ്പോഴാണിത്. കിലോയ്ക്ക് മിനിമം 40 രൂപ ഉറപ്പാക്കുമെന്ന് ഇടതുപക്ഷ മുന്നണി തെരഞ്ഞെടുപ്പു പത്രികയിൽ ഉറപ്പുനൽകിയിരുന്നു. എന്നാൽ പ്രഖ്യാപനം നടപ്പായില്ലെന്നു മാത്രം. രണ്ടുവർഷമായി നല്ല മഴ ലഭിക്കുന്നതിനാൽ ഈവർഷം നല്ല വിളവുണ്ടായ ആശ്വാസത്തിലായിരുന്നു കർഷകർ. വിളവു വർധിച്ചതും പൊമോലിൻ വില കുറഞ്ഞതും തേങ്ങയ്ക്കു തിരിച്ചടിയായി. 23 രൂപയ്ക്ക് വിപണിയിൽ വിൽക്കേണ്ടിവരുന്ന പച്ചത്തേങ്ങ 32 രൂപയ്ക്കാണ് സർക്കാർ സംഭരിക്കുന്നത്. എന്നാൽ ആകെ ഉത്പാദനത്തിന്റെ 10 ശതമാനം പോലും സംഭരിക്കാൻ സാധിക്കാത്തതിനാൽ വിലയിടിവു തടയാനാകുന്നില്ല. ഒരു തെങ്ങിൽ നിന്ന് പരമാവധി എട്ടു നാളികേരം എന്ന നിലയിലാണ് സർക്കാർ സംഭരിക്കുന്നത്. ബാക്കി തേങ്ങ പൊതുവിപണിയിൽ നഷ്ടത്തിന് വിൽക്കേണ്ട ഗതികേടിലാണ് കർഷകർ. നൂറിൽ താഴെ സംഭരണകേന്ദ്രങ്ങളേ സംസ്ഥാനത്തുള്ളൂവെന്നതും പരിമിതിയാണ്. അതേസമയം തേങ്ങവലിക്കാർക്കുള്ള കൂലി കുത്തനെ കൂടുകയും ചെയ്തു. കൊപ്രവിലയിലും വൻ ഇടിവാണ് ഉണ്ടായിരിക്കുന്നത്. ഇതും പച്ചത്തേങ്ങ വില ഇടിയാൻ കാരണമായി. കൊപ്രവില ക്വിന്റലിന് 12,000 രൂപ വരെ ഉണ്ടായിരുന്നത് 8,300 വരെയെത്തി. സർക്കാർ കൊപ്ര സംഭരണം കുറച്ചതാണ് വിനയായത്. ആറുമാസത്തിനിടെ 50,000 ടൺ കൊപ്ര വരെ സംഭരിക്കാൻ കേന്ദ്രം അനുമതി നൽകിയെങ്കിലും സംസ്ഥാനത്ത് സംഭരിച്ചത് 116 ടൺ മാത്രമാണ്.