ട്രിച്ചി • ഹസ്റത്ത് തമ്പലുൽ ആലം ബാദ്ഷാഹ് നത്ഹർ വലി ദർഗയുടെ കീഴിൽ സമസ്തയുടെ നേതൃത്വത്തിൽ ഉന്നത പഠനകേന്ദ്രം സ്ഥാപിക്കാൻ സന്നദ്ധത അറിയിച്ച് ദർഗ ട്രസ്റ്റി. ഇന്നലെ ദർഗയിൽ സിയാറത്തിനു ശേഷം സമസ്ത നേതാക്കളുമായി നടത്തിയ കൂടിക്കാഴ്ചയിൽ ദർഗ എക്സിക്യുട്ടീവ് ട്രസ്റ്റി അല്ലാഹ് ബക്ഷ് ആണ് ഇക്കാര്യം സമസ്ത നേതാക്കളുമായി പങ്കുവച്ചത്. തമിഴ്നാടിന്റെ മതവിദ്യാഭ്യാസ രംഗത്ത് പ്രതീക്ഷ നൽകുന്ന പദ്ധതിക്ക് രൂപം നൽകാൻ സജ്ജമാണെന്ന് സമസ്ത നേതാക്കളും അറിയിച്ചു. ഇതനുസരിച്ച് തുടർ പരിപാടികൾ ആവിഷ്കരിച്ച് നടപ്പാക്കും. ദർഗ ഓഫിസിൽ സമസ്ത സെക്രട്ടറിമാരായ എം.ടി അബ്ദുല്ല മുസ് ലിയാർ, കൊയ്യോട് പി.പി ഉമർ മുസ് ലിയാർ, സാബിഖലി ശിഹാബ് തങ്ങൾ, സംഘാംഗങ്ങൾ എന്നിവർക്ക് സ്വീകരണം നൽകി. സമുദായ വിഷയങ്ങളിൽ സമസ്ത നടത്തുന്ന ഇടപെടലുകൾ സമ്മേളനത്തിൽ തമിഴ്നാട്ടിലെ നേതാക്കൾ എടുത്തുപറഞ്ഞു.