പ്രതിരോധത്തിന് ആക്ഷന്‍ പ്ലാന്‍

സ്വന്തം ലേഖകന്‍

തിരുവനന്തപുരം: ജില്ലയില്‍ 13 പേര്‍ക്കു കൂടി സിക പോസിറ്റീവാണെന്ന് സ്ഥിരീകരിച്ചു. സ്വകാര്യ ആശുപത്രിയില്‍ ജോലി ചെയ്യുന്ന ആരോഗ്യപ്രവര്‍ത്തകരാണിവര്‍.

 

 നഗരത്തിലുള്ള ആശുപത്രിക്ക് സമീപമാണ് താമസിച്ചിരുന്നത്. കഴിഞ്ഞ ദിവസം 24 വയസുകാരി ഗര്‍ഭിണിയില്‍ രോഗം കണ്ടെത്തിയിരുന്നു.

വൈറസിനെതിരേ ആക്ഷന്‍ പ്ലാനുമായി ആരോഗ്യ വകുപ്പ് രംഗത്തെത്തി. രോഗബാധ റിപ്പോര്‍ട്ട് ചെയ്യാന്‍ സാധ്യതയുള്ള പ്രദേശങ്ങളും ആശുപത്രികളും കേന്ദ്രീകരിച്ച് പ്രതിരോധ പ്രവര്‍ത്തനങ്ങള്‍ നടത്തും. 

 

കൊതുകു നിവാരണം ഊര്‍ജിതമാക്കും. അഞ്ചു മാസം വരെ ഗര്‍ഭിണികളായവരില്‍ പനിയുണ്ടെങ്കില്‍ സിക ബാധിച്ചിട്ടില്ലെന്ന് ഉറപ്പാക്കും. 

ലാബ് സൗകര്യം വര്‍ധിപ്പിക്കും. മെഡിക്കല്‍ കോളജുകള്‍ക്കു പുറമേയുള്ള കേസുകള്‍ പബ്ലിക് ഹെല്‍ത്ത് ലാബിലും പരിശോധിക്കാനുള്ള സംവിധാനമുണ്ടാക്കും.