തിരുവനന്തപുരം: ബാറുകള്‍ക്കും കണ്‍സ്യൂമര്‍ഫെഡ് ഔട്ട്‌ലെറ്റുകള്‍ക്കും മദ്യം നല്‍കുമ്പോള്‍ ബിവറേജസ് കോര്‍പറേഷന്‍ ഈടാക്കിയിരുന്ന ലാഭവിഹിതം കുറയ്ക്കാന്‍ സര്‍ക്കാര്‍ തീരുമാനിച്ചതോടെ ബാറുകളില്‍ മദ്യവില്‍പന ഇന്നലെ പുനരാരംഭിച്ചു. 13 ശതമാനം ലാഭവിഹിതം നല്‍കിയാല്‍ മതിയെന്നാണ് പുതിയ തീരുമാനം.

രണ്ടാം ലോക്ക്ഡൗണിനു ശേഷം മദ്യവില്‍പന പുനരാരംഭിച്ചതോടെയാണ് ബെവ്‌കോ ലാഭവിഹിതം ഉയര്‍ത്തിയത്. നേരത്തെ എട്ടു ശതമാനമായിരുന്ന ലാഭവിഹിതം ബാറുകള്‍ക്ക് 25 ശതമാനമാക്കിയും കണ്‍സ്യൂമര്‍ഫെഡിന് 20 ശതമാനമാക്കിയുമാണ് വര്‍ധിപ്പിച്ചത്. ഇതോടെ ബാറുകളും കണ്‍സ്യൂമര്‍ഫെഡ് വില്‍പന ശാലകളും കഴിഞ്ഞ മാസം 20ന് അടച്ചു. ഇതിനിടെ സര്‍ക്കാരുമായി പലതവണ ചര്‍ച്ച നടത്തിയെങ്കിലും തീരുമാനമാകാതെ വന്നതോടെ പല ബാറുകളിലും ബിയര്‍, വൈന്‍ വില്‍പന മാത്രമായി പ്രവര്‍ത്തനം ചുരുങ്ങി. ലാഭവിഹിതം പഴയതുപോലെ എട്ടു ശതമാനമാക്കണമെന്നായിരുന്നു ബാറുടമകളുടെ ആവശ്യം. വിഷയം പരിശോധിക്കാന്‍ സര്‍ക്കാര്‍ മൂന്നംഗ സമിതിയെ നിയോഗിച്ചിരുന്നു.

എക്‌സൈസ് കമ്മിഷണര്‍, നികുതി വകുപ്പ് സെക്രട്ടറി, ധനവകുപ്പ് ഉദ്യോഗസ്ഥന്‍ എന്നിവരടങ്ങുന്ന സമിതി ഇന്നലെ ബാറുടമകളുമായി നടത്തിയ ചര്‍ച്ചയിലാണ് എല്ലാവര്‍ക്കും ലാഭവിഹിതം 13 ശതമാനമായി ഏകീകരിച്ചത്. ഇതോടെ സര്‍ക്കാരുമായി ഏറ്റുമുട്ടല്‍ വേണ്ടെന്നും ബാറുകള്‍ തുറക്കാമെന്നും ഓണ്‍ലൈനായി ചേര്‍ന്ന ബാറുടമകളുടെ യോഗം തീരുമാനിച്ചു. ബാറുകളില്‍ ഇന്നലെ മദ്യവില്‍പന ആരംഭിച്ചെങ്കിലും പാഴ്‌സല്‍ മാത്രമാണ് നല്‍കുന്നത്. സ്റ്റോക്ക് എത്തുന്ന മുറയ്ക്ക് കണ്‍സ്യൂമര്‍ഫെഡ് ഔട്ട്‌ലെറ്റുകളിലും വില്‍പന ആരംഭിക്കും.