ഈങ്ങാപ്പുഴ കക്കാട് ഒഴുക്കില്‍പ്പെട്ട് മരിച്ചത് പെരിന്തല്‍മണ്ണ സ്വദേശിനി

കോഴിക്കോട്: ഈങ്ങാപ്പുഴ കക്കാട് ഒഴുക്കില്‍പ്പെട്ട് മരിച്ചത് പെരിന്തല്‍മണ്ണ സ്വദേശിനി. മലപ്പുറം പെരിന്തല്‍മണ്ണ അങ്ങാടിപ്പുറം വലിയതൊടി തസ്‌നീം(30) ആണ് മരിച്ചത്.ഒഴുക്കില്‍ പെട്ടത് ഒരു കുട്ടിയാണ് എന്നായിരുന്നു ആദ്യം റിപ്പോര്‍ട്ട് ചെയ്തത്.

കൂടെയുണ്ടായിരുന്ന പെരിന്തല്‍മണ്ണ സ്വദേശി മുഹമ്മദ് റാഷിദിനെ രക്ഷപ്പെടുത്തി ഈങ്ങാപ്പുഴയിലെ സ്വാകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ഈങ്ങാപ്പുഴ കക്കാട് ഇക്കോ ടൂറിസം കേന്ദ്രത്തില്‍ വൈകിട്ട് മൂന്നരയോടെയായിരുന്നു അപകടം. വനപ്രദേശത്തുണ്ടായ ശക്തമായ മഴക്കിടെയുണ്ടായ മലവെള്ളപ്പാച്ചിലില്‍ ഇരുവരും അകപ്പെടുകയായിരുന്നു.

ടൂറിസ്റ്റ് ഗൈഡ് ആണ് റാഷിദിനെ കണ്ടതും രക്ഷപ്പെടുത്തിയതും. പിന്നീടാണ് ഒരാള്‍ കൂടി ഒഴുക്കില്‍ പെട്ടിട്ടുണ്ടെന്ന് അറിയുന്നത്. നാട്ടുകാരുടെ സഹായത്തോടെ വീണ്ടും തെരച്ചില്‍ നടത്തി തസ്‌നീമിനെ കണ്ടെത്തി. കോഴിക്കോട് മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും അവര്‍ മരണപ്പെട്ടിരുന്നു.