മട്ടാഞ്ചേരി: വീട്ടുവളപ്പില്‍ കയറി പറ്റിയ മലമ്പാമ്പിനെ നാട്ടുകാരും പൊലിസും ചേര്‍ന്ന് പിടികൂടി. കരുവേലിപ്പടി വാട്ടര്‍ അതോറിറ്റി ഓഫിസിന് സമീപത്തെ വീട്ടുവളപ്പിലാണ് ഒമ്പത് അടി നീളമുള്ള മലമ്പാമ്പിനെ കണ്ടത്. ജനങ്ങള്‍ തിങ്ങി വസിക്കുന്ന മേഖലയില്‍ പാമ്പിനെ കണ്ടതോടെ പ്രദേശവാസികള്‍ അമ്പരപ്പിലായി. ആദ്യം പൊലിസില്‍ അറിയിച്ചപ്പോള്‍ ഫയര്‍ഫോഴ്‌സില്‍ അറിയിക്കുവാനായിരുന്നു മറുപടി.
ഫയര്‍ഫോഴ്‌സില്‍ അറിയിച്ചപ്പോഴാകട്ടെ പാമ്പുപിടുത്തം തങ്ങളുടെ പണിയല്ലായെന്ന് പറഞ്ഞ് ഒഴിഞ്ഞുമാറി. ഇതോടെ ഉന്നത പൊലീസ് ഉദ്യോസ്ഥരുമായി ബന്ധപ്പെട്ടതോടെയാണ് തോപ്പുംപടി സ്റ്റേഷനില്‍ നിന്നും പൊലീസ് എത്തിയത്. ഏതാണ്ട് അര മണിക്കൂറോളം നീണ്ട പരിശ്രമത്തിനൊടുവില്‍ മലമ്പാമ്പിനെ ചാക്കിലാക്കി. തുടര്‍ന്ന് പൊലിസ് സ്റ്റേഷനിലേക്ക് മാറ്റി. കോടനാട് വനം വകുപ്പ് അധികൃതരെ വിവരം അറിയിച്ചിട്ടുണ്ട്.