തിരുവനന്തപുരം: സമൂഹ മാധ്യമങ്ങളില്‍ പങ്കുവയ്ക്കുന്ന ഫോട്ടോകളും വീഡിയോകളും അശ്ലീല സൈറ്റുകളുടെയും ആപ്ലിക്കേഷനുകളുടെയും പരസ്യത്തിന് ഉപയോഗിക്കപ്പെടുന്നെന്നും ജാഗ്രത വേണമെന്നും പൊലിസ്. സമൂഹമാധ്യമങ്ങളില്‍ നിന്നു ഡൗണ്‍ലോഡ് ചെയ്‌തെടുത്ത ഫോട്ടോകളാണ് ഇങ്ങനെ ഉപയോഗിക്കുന്നതെന്നാണ് പൊലിസ് മുന്നറിയിപ്പ്. ഇത്തരം പരാതികളില്‍ അന്വേഷണം നടന്നുവരികയാണെന്നും പൊലിസ് ഫേസ്ബുക്ക് പോസ്റ്റില്‍ പറഞ്ഞു. പ്രൊഫൈലില്‍ സ്വന്തം ഫോട്ടോയോ വീഡിയോയോ പങ്കുവയ്ക്കുമ്പോള്‍ അവ അടുത്ത സുഹൃത്തുക്കള്‍ക്ക് മാത്രം കാണാവുന്ന രീതിയില്‍ സെറ്റിങ്‌സ് ക്രമീകരിക്കണമെന്നും ഫോട്ടോകള്‍ ദുരുപയോഗിക്കപ്പെട്ടാല്‍ സഹായം തേടണമെന്നും പൊലിസ് അറിയിച്ചു.