തുറവൂര്‍: പള്ളിത്തോട് തീരദേശ റോഡില്‍ ജപ്പാന്‍ കുടിവെള്ള പൈപ്പ് പൊട്ടി ലിറ്ററുക്കണക്കിനു ശുദ്ധജലം പാഴാകുന്നു. പള്ളിത്തോട് പ്രാഥമിക ആരോഗ്യ കേന്ദ്രത്തിനു സമീപം രണ്ടു സ്ഥലത്തും സെന്റ് സെബാസ്റ്റ്യന്‍ സ്പള്ളിക്ക് സമീപവും പള്ളിത്തോട് - ചാവടി റോഡിലുമാണ് പൈപ്പ് പൊട്ടി ശുദ്ധജലം പാഴാകുന്നത്.
പ്രാഥമിക ആരോഗ്യ കേന്ദ്രത്തിന സമീപം റോഡരികിലുള്ള പൈപ്പ് പൊട്ടി ശുദ്ധജലം സമീപത്തെ തോട്ടിലേക്ക് ഒഴുകുകയാണ്. ഏഴ് മാസത്തോളമായി വെള്ളം നഷ്ടപ്പെടുന്നത് സമീപവാസികള്‍ സുപ്രഭാതത്തോട് പറഞ്ഞു. പല തവണ ജല അതോറിറ്റി യില്‍ പരാതിപ്പെട്ടിട്ടും നടപടിയൊന്നു മുണ്ടായില്ലെന്നു പള്ളിത്തോട് നിവാസികള്‍ വ്യക്തമാക്കി. കുടിവെള്ളം പാഴാകുന്നതുമൂലം കുത്തിയതോട്, തുറവൂര്‍ പഞ്ചായത്ത് തീരപ്രദേശങ്ങളില്‍ കുടിനീര്‍ ക്ഷാമം രൂക്ഷമാണ്.തുറവൂര്‍ പഞ്ചായത്ത് പതിനേഴാം വാര്‍ഡില്‍ തെക്കേ കാട് കോളനിയില്‍ 300 ലധികം കുടുംബങ്ങളാണ് കുടിനീര്‍ കിട്ടാതെ വലയുന്നത്.കീ ലോമീറ്ററുകള്‍ നടന്നാണ് ഇവര്‍ ഒരു നേരത്തെ കുടിനീര്‍ ശേഖരിക്കുന്നത്. തൈക്കാട്ടുശ്ശേരിയില്‍ നിന്നും ശുദ്ധികരിച്ച വെള്ളം തുറവൂര്‍ ടാങ്കില്‍ എത്തിച്ചാണ് തീരദേശത്ത് വിതരണം ചെയ്യുന്നത്. ജപ്പാന്‍ കുടിവെള്ള സംവിധാനം വന്നതോടെ തീരദേശപ്രദേശങ്ങളില്‍ നിലനിന്നിരുന്ന കുടിനീര്‍ ക്ഷാമത്തിന് പരിഹാരമുണ്ടായെങ്കിലും ഇത്തരം പൈപ്പ് പൊട്ടി ജലം പാഴാകാന്‍ തുടങ്ങിയതോടെ കുടിനീര്‍ ക്ഷാമം വീണ്ടും രൂക്ഷമായിരിക്കുകയാണ്. തീരദേശത്ത് ജനകീയാവശ്യം പരിഗണിച്ച് ഇനിയെങ്കിലും തകര്‍ന്നു കിടക്കുന്ന പൈപ്പുകള്‍ ഉടനെ നന്നാക്കാന്‍ ബന്ധപ്പെട്ടവര്‍ തയ്യാറാകുക തന്നെ വേണം.