മണിപ്പൂരില്‍ വീണ്ടും സംഘര്‍ഷം; വെടിവയ്പില്‍ രണ്ട് പേര്‍ മരിച്ചു

മണിപ്പൂരില്‍ വീണ്ടും ഏറ്റുമുട്ടല്‍. ചുരാചന്ദ്പൂര്‍, ബിഷ്ണുപൂര്‍ ജില്ലകളുടെ അതിര്‍ത്തിയില്‍ സമുദായങ്ങള്‍ തമ്മില്‍ നടന്ന വെടിവയ്പ്പില്‍ രണ്ട് പേര്‍ കൊല്ലപ്പെട്ടു. കുക്കിസോമി സമുദായത്തില്‍ നിന്നുള്ള രണ്ട് പേരാണ് മരിച്ചത്.സംഭവത്തില്‍ രണ്ട് പൊലീസ് ഉദ്യോഗസ്ഥര്‍ ഉള്‍പ്പെടെ അഞ്ച് പേര്‍ക്ക് ഗുരുതരമായി പരുക്കേല്‍ക്കുകയും ചെയ്തു.

രണ്ട് വിഭാഗങ്ങള്‍ തമ്മില്‍ ബുധനാഴ്ച ആരംഭിച്ച വെടിവയ്പ്പ് വ്യാഴാഴ്ച പുലര്‍ച്ചെവരെ നീണ്ടതായാണ് റിപ്പോര്‍ട്ട്. ഇതോടെ ഓഗസ്റ്റ് 29 ന് ആരംഭിച്ച അക്രമസംഭവങ്ങളില്‍ മേഖലയില്‍ മരിച്ചവരുടെ എണ്ണം നാലായി. അതേസമയം ചുരാചന്ദ്പൂരില്‍ കുക്കി വിഭാഗം അനിശ്ചിതകാല ബന്ദിന് ആഹ്വാനം ചെയ്തു. കുക്കി ഭൂരിപക്ഷ മേഖലകളില്‍ ആക്രമണം വര്‍ധിച്ച പശ്ചാത്തലത്തിലാണ് തീരുമാനം.