ദുബൈ: സെപ്റ്റംബര്‍ 25 ന് സൗഹൃദത്തിന്റെയും സാഹോദര്യത്തിന്റെയും സന്ദേശവുമായി അബൂദബി കെ.എം.സി.സി സംസ്ഥാന കമ്മിറ്റി ഒരുക്കുന്ന സംഗമത്തില്‍ പ്രമുഖ നേതാക്കള്‍ പങ്കെടുക്കും. മുസ്ലിംലീഗ് സംസ്ഥാന പ്രസിഡണ്ട് പാണക്കാട് സയ്യിദ് സ്വാദിഖലി ശിഹാബ് തങ്ങള്‍ മുഖ്യാഥിതിയായി സംബന്ധിക്കുന്ന പരിപാടിയില്‍ വിവിധ മത നേതാക്കളും പ്രമുഖ വ്യക്തിത്വങ്ങളും സംബന്ധിക്കുമെന്ന് ബന്ധപ്പെട്ടവര്‍ വാര്‍ത്താസമ്മേളനത്തില്‍ അറിയിച്ചു. 25ന് രാത്രി 8 മണിക്ക് അബൂദബി ഇന്ത്യന്‍ ഇസ്ലാമിക് സെന്ററിലാണ് പരിപാടി. മുസ്ലിംലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയും സംഗമത്തിനായി എത്തും.മുസ്ലിം ലീഗ് പ്രസിഡണ്ട് പദവി ഏറ്റെടുത്തശേഷം ആദ്യമായി അബൂദബിയിലെത്തുന്ന സ്വാദിഖലി തങ്ങളുടെ പരിപാടി തികച്ചും വ്യത്യസ്ഥവും മാതൃകാപരവുമായിരിക്കുമെന്നും അബൂദബി കെ.എം.സി.സി ഭാരവാഹികള്‍ വ്യക്തമാക്കി.പരിപാടിയുടെ വിജയത്തിനുമായി 101 അംഗ സ്വാഗതം സംഘം രൂപീകരിച്ചു. വിവിധ ജില്ലാ,മണ്ഡലം,പഞ്ചായത്ത് കമ്മിറ്റികളില്‍ കണ്‍വെന്‍ഷനുകളും പ്രചാരണ പരിപാടികളും നടന്നുവരികയാണ്. സംസ്ഥാന കെ.എം.സി.സി പ്രസിഡണ്ട് ശുക്കൂറലി കല്ലുങ്ങല്‍, യു.എ.ഇ കെ.എം.സി.സി നാഷണല്‍ കമ്മിറ്റി വര്‍ക്കിംഗ് പ്രസിഡണ്ട് യു.അബൂദുല്ല ഫാറൂഖി, ജനറല്‍ സെക്രട്ടറി അഡ്വ.കെ.വി മുഹമ്മദ്കുഞ്ഞി, ട്രഷറര്‍ പി.കെ അഹമ്മദ്,സെക്രട്ടറിമാരായ മജീദ് അണ്ണാന്‍തൊടി, റഷീദ് പട്ടാമ്പി എന്നിവരും വാര്‍ത്താ സമ്മേളനത്തില്‍ പങ്കെടുത്തു.