തിരുവനന്തപുരം: ബി.ടെക് പരീക്ഷ നിശ്ചയിച്ച പ്രകാരം നടത്തുമെന്ന് സാങ്കേതിക സര്‍വകലാശാല. പരീക്ഷ എഴുതാന്‍ സാധിക്കാത്തവര്‍ക്ക് ഒരു അവസരം കൂടി നല്‍കും. ഇത് ആദ്യ റെഗുലര്‍ ചാന്‍സായി തന്നെ പരിഗണിക്കും. കൊവിഡ് വ്യാപനത്തിന്റെ പശ്ചാത്തലത്തിലാണ് തീരുമാനം.

ജൂലൈ 9 മുതല്‍ തുടങ്ങിയ പരീക്ഷകള്‍, ഇതര സര്‍വകലാശാലകളില്‍ നടന്നുവരുന്നത് പോലെ ഓഫ് ലൈനായിത്തന്നെ തുടരുമെന്ന് വൈസ് ചാന്‍സലര്‍ ഡോ.എം.എസ് രാജശ്രീ വ്യക്തമാക്കി. വിദ്യാര്‍ഥികള്‍ക്ക് അവരുടെ വീടിന് സമീപമുള്ള എന്‍ജിനീയറിങ് കോളജുകളില്‍ തന്നെ പരീക്ഷ എഴുതുവാനുള്ള പ്രത്യേക അനുമതിയും നല്‍കിയിട്ടുണ്ട്. സംസ്ഥാന സര്‍ക്കാര്‍ നിര്‍ദ്ദേശിച്ചിട്ടുള്ള എല്ലാ കൊവിഡ് പ്രോട്ടോക്കോളും കര്‍ശനമായി പാലിക്കണമെന്ന് കോളേജുകള്‍ക്ക് സര്‍വ്വകലാശാല നിര്‍ദ്ദേശം നല്‍കിയിട്ടുണ്ട്.