പ്രത്യേക ലേഖകൻ
തിരുവനന്തപുരം • എൻ.ഐ.എ റെയ്ഡിലും നേതാക്കളെ അറസ്റ്റ് ചെയ്തതിലും പ്രതിഷേധിച്ച് പോപുലർ ഫ്രണ്ട് ആഹ്വാനം ചെയ്ത ഹർത്താലിൽ സംസ്ഥാനത്തുടനീളം വ്യാപക അക്രമം. രാവിലെ മുതൽ വാഹനങ്ങൾക്കും കടകൾക്കും നേരേ ഹർത്താൽ അനുകൂലികൾ ആക്രമണം അഴിച്ചുവിട്ടു. 170 പേരെ പൊലിസ് അറസ്റ്റ് ചെയ്തു. 157 കേസുകൾ രജിസ്റ്റർ ചെയ്തു. 368 പേരെ കരുതൽ തടങ്കലിലാക്കുകയും ചെയ്തു. സി.സി.ടി.വി ദൃശ്യങ്ങൾ പരിശോധിച്ച് ആക്രമം നടത്തിയവരെ കസ്റ്റഡിയിൽ എടുക്കാൻ ജില്ല പൊലിസ് മേധാവികൾക്ക് ക്രമസമാധാന ചുമതലയുള്ള എ.ഡി.ജി.പി വിജയ് സാഖറെ നിർദേശം നൽകി. ഹെൽമറ്റും മുഖംമൂടിയും ധരിച്ചായിരുന്നു അക്രമങ്ങൾ. സ്വകാര്യ വാഹനങ്ങൾ നിരത്തിലിറങ്ങിയെങ്കിലും ഹർത്താൽ അനുകൂലികൾ തടഞ്ഞു. അടിയന്തരാവശ്യങ്ങൾക്ക് പുറത്തിറങ്ങിയവരുടെ ഓട്ടോറിക്ഷകളടക്കം അടിച്ചുതർത്തു. നഗരങ്ങളിൽ കട കമ്പോളങ്ങൾ അടഞ്ഞുകിടന്നെങ്കിലും ഗ്രാമപ്രദേശങ്ങളെ ഹർത്താൽ ബാധിച്ചില്ല.
അതേസമയം, പയ്യന്നൂരിൽ കടയടപ്പിക്കാനെത്തിയ പോപുലർ ഫ്രണ്ട് പ്രവർത്തകരെ നാട്ടുകാർ കൈകാര്യം ചെയതു. ഇവരെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. തിരുവനന്തപുരം, ആലപ്പുഴ, പത്തനംതിട്ട, എറണാകുളം, കോഴിക്കോട്, വയനാട്, പാലക്കാട്, കണ്ണൂർ, കോട്ടയം ജില്ലകളിലാണ് വ്യാപക ആക്രമണമുണ്ടായത്. തൃശൂരിൽ രോഗിയുമായി പോയ ആംബുലൻസ് പോലും ആക്രമിക്കപ്പെട്ടു.
കെ.എസ്.ആർ.ടി.സി ബസുകൾക്കൊപ്പം സ്വകാര്യ വാഹനങ്ങളും സ്ഥാപനങ്ങളും വ്യാപകമായി ആക്രമിക്കപ്പെട്ടു. ഹർത്താലിൽ അവശ്യ സർവിസുകളെ ഒഴിവാക്കുന്ന രീതിയാണ് കണ്ടുവന്നിരുന്നതെങ്കിൽ ഇന്നലെ അവശ്യ സർവിസുകളെയും ഹർത്താലുകാർ വെറുതേവിട്ടില്ല. പാൽ ബൂത്തുകൾ അടിച്ചുതകർക്കുകയും പത്ര വാഹനത്തിനും ചാനൽ വാഹനത്തിനും നേരെയും അക്രമമുണ്ടാവുകയും ചെയ്തു.
സെക്രട്ടേറിയറ്റിൽ 58 ശതമാനം പേർ ജോലിക്ക് ഹാജരായെങ്കിലും മറ്റു സർക്കാർ ഓഫിസുകളിൽ ഹാജർ നില വളരെ കുറവായിരുന്നു.