തൊടുപുഴ:   എന്‍.ജി.ഒ യൂനിയന്‍ ജില്ലാകമ്മിറ്റിയുടെ ആഭിമുഖ്യത്തിലുള്ള പഠനക്യാംപ് തൊടുപുഴയില്‍ ആരംഭിച്ചു. തൊടുപുഴ അര്‍ബന്‍ ബാങ്ക് ഹാളില്‍ സി.പി.എം ജില്ലാ സെക്രട്ടറി കെ.കെ ജയചന്ദ്രന്‍ ക്യാമ്പ് ഉദ്ഘാടനം ചെയ്തു. യൂനിയന്‍ ജില്ലാ പ്രസിഡന്റ് എസ് സുനില്‍കുമാര്‍ അധ്യക്ഷനായി.
ക്യാംപിന്റെ ആദ്യദിനത്തില്‍ 'സ്ത്രീപ്രശ്‌നങ്ങള്‍: വെല്ലുവിളികളും പ്രതിരോധവും' എന്ന വിഷയത്തില്‍ ജനാധിപത്യ മഹിളാ അസോസിയേഷന്‍ സംസ്ഥാന കമ്മിറ്റിയംഗം പി.എന്‍ സരസമ്മാളും 'സര്‍വീസ് പ്രശ്‌നങ്ങളും നിയമങ്ങളും' എന്ന വിഷയത്തില്‍ എന്‍.ജി.ഒ യൂനിയന്‍ ജില്ലാകമ്മിറ്റിയംഗം കെ സി സജീവനും 'മതം-ജാതി-വര്‍ഗീയത' എന്ന വിഷയത്തില്‍ യൂനിയന്‍ മുന്‍ സംസ്ഥാന സെക്രട്ടറി ബി ആനന്ദക്കുട്ടനും ക്ലാസെടുത്തു. ഇന്ന്  യൂനിയന്‍ സംസ്ഥാന ജനറല്‍ സെക്രട്ടറി ടി.സി മാത്തുക്കുട്ടി 'സംഘടന' എന്ന വിഷയത്തിലും സി.ഐ.ടി.യു ജില്ലാ പ്രസിഡന്റ് പി.എസ് രാജന്‍ 'ട്രേഡ് യൂനിയന്‍ ചരിത്രം' എന്ന വിഷയത്തിലും ക്ലാസെടുക്കും.