തിരുവനന്തപുരം: വിഴിഞ്ഞം പദ്ധതിയുമായി ബന്ധപ്പെട്ട പ്രശ്‌നങ്ങള്‍ പരിഹരിക്കാന്‍ നേരിട്ട് രംഗത്തിറങ്ങി സി.പി.എം. വിഴിഞ്ഞം സമരം 40 ദിവസം പിന്നിട്ടിട്ടും സമവായ ചര്‍ച്ചകള്‍ പരാജയപ്പെട്ടതോടെയാണ് പാര്‍ട്ടി നേരിട്ട് ഇടപെടാന്‍ തീരുമാനിച്ചത്.

കഴിഞ്ഞ ദിവസം വിഴിഞ്ഞം സമരസമിതിയുമായി മന്ത്രിസഭാ ഉപസമിതി നടത്തിയ ആറാം വട്ടചര്‍ച്ചയും നേരത്തെ മുഖ്യമന്ത്രിയുമായും സമരസമിതി നടത്തിയ ചര്‍ച്ചയും പരാജയപ്പെട്ടിരുന്നു. ഇതോടെയാണ് പാര്‍ട്ടി സംസ്ഥാന സെക്രട്ടറി എം.വി ഗോവിന്ദന്‍ വൈകീട്ട് എ.കെ.ജി സെന്ററില്‍ സമരത്തിന് നേതൃത്വം നല്‍കുന്ന ലത്തീന്‍ അതിരൂപതയുമായി ചര്‍ച്ച നടത്തിയത്.

പദ്ധതിയുമായി ബന്ധപ്പെട്ട പ്രശ്‌നങ്ങള്‍ പരിഹരിക്കാന്‍ ഇടപെടലുണ്ടാകുമെന്ന് ഉറപ്പ് ലഭിച്ചതായി കൂടിക്കാഴ്ചയ്ക്ക് ശേഷം സമരസമിതി പ്രതികരിച്ചു.