ഉപതെരഞ്ഞടുപ്പ്: ആവേശം അലയടിച്ച് പുതുപ്പള്ളി, പരസ്യ പ്രചാരണം അവസാനിച്ചു

കോട്ടയം: ഒരു മാസത്തോളം നീണ്ടുനിന്ന പുതുപ്പള്ളി ഉപതെരഞ്ഞെടുപ്പിന്റെ പരസ്യപ്രചാരണ അവസാനിച്ചു. പ്രവര്‍ത്തകര്‍ക്ക് വലിയ ആവേശം നല്‍കുന്ന റോഡ് ഷോകളുമായി മൂന്ന് മുന്നണികളുടെയും നേതാക്കള്‍ പുതുപ്പള്ളിയില്‍ നിറഞ്ഞുനില്‍ക്കുകയായിരുന്നു അവസാന നിമിഷങ്ങളില്‍. കൊട്ടിക്കലാശത്തിന്റെ മണിക്കൂറിലേക്ക് കടന്നപ്പോള്‍ പുതുപ്പള്ളി പ്രവര്‍ത്തകരുടെ ആവേശവും അലയടിച്ചുയര്‍ന്നു. കൊട്ടിക്കലാശം നടക്കുന്ന പാമ്പാടിയിലേക്ക് കൊടികളും തോരണങ്ങളുമായി പ്രവര്‍ത്തകര്‍ ഒഴുകിയെത്തി. കൊട്ടിക്കലാശത്തിന്റെ അവസാന മണിക്കൂറില്‍ പുതുപ്പള്ളിയില്‍ ചര്‍ച്ചയായത് കെ സുധാകരന്‍ മുഖ്യമന്ത്രിക്കെതിരെ നടത്തിയ പോത്ത് പരാമര്‍ശവും ഉമ്മന്‍ ചാണ്ടിയുടെ ചികിത്സയുമായി ബന്ധപ്പെട്ട വിവാദ ഓഡിയോയുമാണ്. സെപ്തംബര്‍ അഞ്ചിനാണ് തെരഞ്ഞെടുപ്പ്. എട്ടിന് വോട്ടെണ്ണും. വൈകീട്ട് ആറ് മണിക്കാണ് പരസ്യപ്രചാരണം അവസാനിച്ചത്.