ഡെറാഡൂണ്‍: ഉത്തരാഖണ്ഡില്‍ ബി.ജെ.പി മുന്‍ മന്ത്രിയുടെ മകന്‍ പ്രതിയായ കൊലപാതക കേസുമായി ബന്ധപ്പെട്ട് ബി.ജെ.പി നേതാവ് വിനോദ് ആര്യയെയും മകന്‍ അങ്കിതിനെയും പാര്‍ട്ടി പുറത്താക്കി. ഇവരുടെ ഉടമസ്ഥതയിലുള്ള റിസോര്‍ട്ടിലെ റിസപ്ഷനിസ്റ്റായ 19കാരിയെ കൊലപ്പെടുത്തിയത് അതിഥികള്‍ക്ക് കിടക്ക പങ്കിടാന്‍ വിസമ്മതിച്ചതിനാണെന്ന് ഡി.ജി.പി അശോക് കുമാര്‍ പറഞ്ഞു.

ബി.ജെ.പി നേതാവും മുന്‍ മന്ത്രിയുമായ വിനോദ് ആര്യയുടെ മകന്‍ പുല്‍കിത് ആര്യയാണ് കേസിലെ മുഖ്യപ്രതി. അങ്കിത ഭണ്ഡാരിയെന്ന പെണ്‍കുട്ടിയെ കനാലില്‍ തള്ളിയിട്ടാണ് കൊലപ്പെടുത്തിയത്. ആര്യ ഉള്‍പ്പെടെ മൂന്നുപേരാണ് കേസിലെ പ്രതികള്‍. ആറുദിവസം മുമ്പ് മരിച്ച പെണ്‍കുട്ടിയുടെ മൃതദേഹം ശനിയാഴ്ചയാണ് കണ്ടെത്തിയത്. എയിംസില്‍ പോസ്റ്റ്‌മോര്‍ട്ടം നടത്തും.

റിസോര്‍ട്ടിന്റെ ഉടമയും മാനേജര്‍മാരും അതിഥികളുമായി ലൈംഗിക ബന്ധത്തിലേര്‍പ്പെടാന്‍ നിര്‍ബന്ധിക്കുന്നതായി പെണ്‍കുട്ടി സുഹൃത്തിനോട് പരാതി പറഞ്ഞിരുന്നു.
സംഭവം സംസ്ഥാനത്ത് വന്‍ പ്രതിഷേധത്തിനാണ് വഴിവച്ചത്. റിസോര്‍ട്ടിന്റെ ഒരുഭാഗം പ്രാദേശിക ഭരണകൂടം ബുള്‍ഡോസര്‍ ഉപയോഗിച്ച് പൊളിച്ചുനീക്കി. പിന്നാലെ റിസോര്‍ട്ടിന്റെ മറ്റുഭാഗത്ത് ജനക്കൂട്ടം തീയിട്ടു. ബി.ജെ.പി നേതാവിന്റെ കാറിനും തീവച്ചു.