മൂന്നാര്‍: നാട്ടുവൈദ്യത്തിന്റെ മറവില്‍ മൂന്നാര്‍ ടൗണില്‍ കഞ്ചാവ് വില്‍പന നടത്തിയയാളെ മൂന്നാര്‍ എക്‌സൈസ് സംഘം പിടികൂടി. തമിഴ്‌നാട് ഉടുമല്‍പ്പെട്ട സ്വദേശി മൈല്‍സ്വാമി (58)നെയാണ് എക്‌സൈസ് സംഘം പിടികൂടിയത്. കഞ്ചാവ് പൊതികളിലാക്കി സഞ്ചാരികള്‍ക്കിടയില്‍ തമിഴ്‌നാട് സ്വദേശികള്‍ വില്‍പന നടത്തുന്നതായി മൂന്നാര്‍ എക്‌സൈസ് ഇന്‍സ്‌പെക്ടര്‍ ബിനുവിന് രഹസ്യ സന്ദേശം ലഭിച്ചിരുന്നു. സംഭവത്തെ തുടര്‍ന്ന് നടത്തിയ പരിശോധനയിലാണ് മൈല്‍സ്വാമിയെ 100 പൊതി കഞ്ചാവുമായി പിടികൂടിയത്. കഴിഞ്ഞ മാസം മൂന്നാര്‍ മാട്ടുപ്പെട്ടി സ്റ്റാന്റില്‍ നിന്നും മറ്റൊരാളെ എക്‌സൈസ് സംഘം കഞ്ചാവുമായി പിടികൂടിയിരുന്നു. പ്രവന്റീവ് ഓഫീസര്‍ അനുബാബു, സിവില്‍ എക്‌സൈസ് ഓഫീസര്‍മാരായ മീരാന്‍ കെഎസ്, സുരേഷ് കെ എം, വിനോദ് സി എസ്, ഷൈജു വി റ്റി എന്നിവര്‍ ചേര്‍ന്നാണ് പ്രതിയെ പിടികൂടിയത്.