വി.ഡി സതീശൻ

കോൺഗ്രസെന്ന ആശയത്തെ ഒരു വികാരമായി ജീവിതാവസാനം വരെ കൊണ്ടുനടന്ന നേതാവാണ് ആര്യാടൻ മുഹമ്മദ്. ഏഴ് പതിറ്റാണ്ട് കാലം മലബാറിലെ കോൺഗ്രസ് പ്രസ്ഥാനത്തിന് ആര്യാടൻ നെടുനായകത്വം വഹിച്ചു. മലപ്പുറം ജില്ലാ കോൺഗ്രസ് കമ്മിറ്റിയുടെ ആദ്യ പ്രസിഡന്റായിരുന്ന ആര്യാടന്റെ സ്ഥിരോത്സാഹവും കഠിന പ്രയത്‌നവുമാണ് ജില്ലയിൽ കോൺഗ്രസിന് ശക്തമായ വേരോട്ടമുണ്ടാക്കിയത്. കാർക്കശ്യം നിറഞ്ഞ രാഷ്ട്രീയ നിലപാടുകൾക്കൊപ്പം എന്തിനെയും നേരിടാനുള്ള ചങ്കൂറ്റവുമാണ് ആര്യാടനിലെ രാഷ്ട്രീയക്കാരനെ പരുവപ്പെടുത്തിയതും വളർത്തിയതും. മലബാറിന്റെ രാഷ്ട്രീയഭൂമികയിൽ മതേതര, ജനാധിപത്യത്തിന്റെ അടയാളമായി മാറുകയായിരുന്നു ആര്യാടൻ. ഇന്ത്യയെന്ന മഹത്തായ ആശയത്തിന് വേണ്ടി എക്കാലവും നിലകൊണ്ട കറകളഞ്ഞ മതേതരവാദി.

സ്വയാർജിതമായ വായനയും അറിവും കൊണ്ട് കേരള നിയമസഭയിലെ അതിപ്രഗത്ഭരായ അംഗങ്ങളുടെ ഗണത്തിൽ മുൻനിരയിലാണ് ആര്യാടന്റെ സ്ഥാനം. വ്യക്തിപരമായി എനിക്ക് ഗുരുനാഥനെയാണ് നഷ്ടപ്പെട്ടത്. 2001ൽ ആദ്യമായി നിയമസഭയിൽ എത്തുമ്പോൾ ഒരു അധ്യാപകനെ പോലെ സഭാ നടപടിക്രമങ്ങളെക്കുറിച്ചും ബജറ്റിനെക്കുറിച്ചും പഠിപ്പിച്ചുതന്നത് അദ്ദേഹമായിരുന്നു.
നിയമനിർമാണ വേളകളിൽ അദ്ദേഹം ഉയർത്തുന്ന വാദഗതികൾ ഏതൊരു പ്രഗത്ഭനായ അഭിഭാഷകനെയും അസൂയപ്പെടുത്തുന്ന തരത്തിലായിരുന്നു. നിയമത്തിൽ ബിരുദവും ബിരുദാനന്തര ബിരുദവും ഹൈക്കോടതിയിൽ പ്രാക്ടീസ് ചെയ്ത അനുഭവ പരിചയവുമുള്ള ഞാൻ ഉൾപ്പെടെയുള്ള മറ്റ് അംഗങ്ങളേക്കാൾ നൂറിരട്ടി ഭരണഘടനാ ബോധ്യം മെട്രിക്കുലേഷൻ മാത്രം പാസായ അദ്ദേഹത്തിനുണ്ടായിരുന്നു. ഭരണഘടനയുടെ ചട്ടക്കൂടിൽ നിന്നുകൊണ്ട് മാത്രമാണ് ആര്യാടൻ നിയമസഭയിൽ പ്രസംഗിച്ചത്. ഇന്ത്യൻ ഭരണഘടനയെ പറ്റി ഇത്രയും ആഴത്തിൽ അറിവുള്ള മറ്റൊരു രാഷ്ട്രീയ നേതാവിനെ ഞാൻ കണ്ടിട്ടില്ല.

രാഷ്ട്രീയ പ്രതിസന്ധികളുണ്ടായ ഘട്ടങ്ങളിലെല്ലാം കൃത്യമായ ഇടപെടലുകളിലൂടെ അവ പരിഹരിച്ച് മുന്നണിയെയും പാർട്ടിയേയും ഒരുകാലത്ത് ഒറ്റക്കെട്ടായി മുന്നോട്ട് കൊണ്ടുപോകുന്നതിൽ ആര്യാടന്റെ പങ്ക് വലുതായിരുന്നു. ട്രേഡ് യൂനിയൻ രംഗത്ത് പ്രതിസന്ധികളിൽ ഉലയാതെ പ്രവർത്തിച്ചുവന്നതിന്റെ തഴക്കവും പഴക്കവും ആര്യാടനിലെ രാഷ്ട്രീയക്കാരന് പ്രായോഗികതയുടെ തലംകൂടി നൽകി.
കോൺഗ്രസിലെ പുതുതലമുറയ്ക്ക് എന്നും പിന്തുണയും ആവേശവുമായി അദ്ദേഹം ഒപ്പമുണ്ടായിരുന്നു. ആര്യാടന്റെ അസാന്നിധ്യം നിയമസഭയിലുണ്ടാക്കിയ ശൂന്യത ഞങ്ങൾക്കെല്ലാം അനുഭവപ്പെട്ടിരുന്നു. ഇപ്പോൾ ആര്യാടൻ ഇല്ലാത്ത കേരള രാഷ്ട്രീയത്തെയും മലബാർ രാഷ്ട്രീയത്തെയും ഞങ്ങൾക്ക് അഭിമുഖീകരിക്കേണ്ടി വരുന്നു.