തിരുവനന്തപുരം: എസ്.എസ്.എല്‍.സി പരീക്ഷയില്‍ സംസ്ഥാനത്തെ 14 ല്‍ 13 ജില്ലകളിലും 99 ശതമാനത്തിനു മുകളില്‍ വിദ്യാര്‍ഥികള്‍ ഉപരിപഠന യോഗ്യത നേടി. 99.85 ശതമാനം വിദ്യാര്‍ഥികള്‍ വിജയിച്ച കണ്ണൂരാണ് വിജയശതമാനത്തില്‍ ഏറ്റവും മുന്നില്‍. 98.13 ശതമാനം വിദ്യാര്‍ഥികളെ വിജയിപ്പിച്ച വയനാടാണ് ഏറ്റവും പിന്നില്‍. തിരുവനന്തപുരം 99.16, കൊല്ലം 99.25, പത്തനംതിട്ട 99.73, ആലപ്പുഴ 99.77, കോട്ടയം 99.75, ഇടുക്കി 99.38, എറണാകുളം 99.8, തൃശൂര്‍ 99.31, പാലക്കാട് 99.35, മലപ്പുറം 99.39, കോഴിക്കോട് 99.68, കാസര്‍കോട് 99.74 എന്നിങ്ങനെയാണ് മറ്റു ജില്ലകളിലെ വിജയശതമാനം.
വിജയശതമാനം ഏറ്റവും കൂടുതലുള്ള വിദ്യാഭ്യാസ ജില്ല പാലയും(99.97) കുറവ് വയനാടു(98.13)മാണ്. ഏറ്റവും കൂടുതല്‍ വിദ്യാര്‍ഥികള്‍ പരീക്ഷ എഴുതിയ റവന്യൂ ജില്ലയും (76,014) വിദ്യാഭ്യാസ ജില്ലയും (26,513) മലപ്പുറമാണ്. ഏറ്റവും കുറവ് വിദ്യാര്‍ഥികള്‍ പരീക്ഷ എഴുതിയ റവന്യൂ ജില്ല പത്തനംതിട്ടയും (10,369) വിദ്യാഭ്യാസ ജില്ല കുട്ടനാടുമാണ്. കുട്ടനാട്ടില്‍ 2047 വിദ്യാര്‍ഥികള്‍ മാത്രമാണ് പരീക്ഷ എഴുതിയത്. മലപ്പുറം പി.കെ.എം.എച്ച്.എസ്.എസ് എടരിക്കോട്ടാണ് ഏറ്റവുമധികം വിദ്യാര്‍ഥികള്‍ പരീക്ഷ എഴുതിയത്. 2076 പേര്‍. ലിസ്റ്റില്‍ ഏറ്റവും പിന്നിലുള്ള നിരണം വെസ്റ്റ് കിഴക്കുംഭാഗം സെന്റ് തോമസ് എച്ച്.എസ്.എസില്‍ പരീക്ഷ എഴുതിയ ഏക വിദ്യാര്‍ഥി വിജയിച്ചു.