ഉമ്മന്‍ ചാണ്ടിക്ക് പുതുപ്പള്ളിക്കാര്‍ നല്‍കുന്ന വലിയ യാത്രയയപ്പ് ഇന്ന്: അച്ചു ഉമ്മന്‍

കോട്ടയം: ഉമ്മന്‍ ചാണ്ടിക്ക് പുതുപ്പള്ളിക്കാര്‍ നല്‍കുന്ന വലിയ യാത്രയയപ്പ് ഇന്നാണെന്ന് അച്ചു ഉമ്മന്‍. അവസാന യാത്രയയപ്പിന്റെ ഇടിമുഴക്കം വോട്ടെണ്ണല്‍ ദിവസം കേരളമാകെ കേള്‍ക്കാമെന്നും അച്ചു പറഞ്ഞു. പുതുപ്പള്ളിയില്‍ മാധ്യമങ്ങളോട് പ്രതികരിക്കുകയായിരുന്നു അവര്‍.

ചാണ്ടിക്ക് റെക്കോഡ് ഭൂരിപക്ഷം കിട്ടും. ഉമ്മന്‍ ചാണ്ടിയുടെ ഏറ്റവും വലിയ ഭൂരിപക്ഷത്തെ മറികടക്കും. ഈ തെരഞ്ഞെടുപ്പില്‍ സര്‍ക്കാര്‍ വിരുദ്ധ വികാരമുണ്ട്. കോണ്‍ഗ്രസിന് ഇത്രയധികം അനുകൂല സാഹചര്യമുള്ള തെരഞ്ഞെടുപ്പ് മുമ്പ് ഉണ്ടായിട്ടില്ല. എല്ലാത്തിനും ഉപരി ഉമ്മന്‍ ചാണ്ടി എന്ന ഘടകം നിലവിലുണ്ട്. ഉമ്മന്‍ ചാണ്ടി വിരുദ്ധത പുതുപ്പള്ളിയില്‍ വിലപ്പോവില്ല. ഈ സാഹചര്യങ്ങള്‍ നിലനില്‍ക്കുന്നത് കൊണ്ടാണ് എതിര്‍ഭാഗം ആരോപണങ്ങളും വിവാദങ്ങളും ഉണ്ടാക്കുന്നത്. ഉമ്മന്‍ ചാണ്ടിയുടെ ചികിത്സാ വിവാദം ഉയര്‍ത്തിയതും അതുകൊണ്ടാണ്. 20 വര്‍ഷത്തെ പ്രവര്‍ത്തന പരിചയമുള്ള വിദ്യാസമ്പന്നനായ സ്ഥാനാര്‍ഥിയാണ് യു.ഡി.എഫിന്റെത്. അതിനും മുകളിലാണ് 53 വര്‍ഷം ജനങ്ങളെ സേവിച്ച ഉമ്മന്‍ ചാണ്ടിയെന്നും അവര്‍ പറഞ്ഞു. സൈബര്‍ അധിക്ഷേപ കേസില്‍ പൊലിസിന് മൊഴിനല്‍കി. ഇനി നടപടികള്‍ മുന്നോട്ട് കൊണ്ടുപോകേണ്ടത് പൊലിസാണ്. നടപടികള്‍ വൈകുന്നത് എന്ത് കൊണ്ടാണെന്ന് അറിയില്ലെന്നും അവര്‍ പറഞ്ഞു.