ന്യൂഡല്‍ഹി: അത്യാധുനിക ഇന്ത്യന്‍ മുങ്ങിക്കപ്പലായ സ്‌കോര്‍പീന്‍ ക്ലാസിനെക്കുറിച്ചുള്ള തന്ത്രപ്രധാന വിവരങ്ങള്‍ ചോര്‍ന്ന സംഭവത്തില്‍ ഫ്രഞ്ച് നാവികസേനയില്‍നിന്നു വിരമിച്ച ഉദ്യോഗസ്ഥന്‍ സംശയനിഴലില്‍.


ഫ്രഞ്ച് പ്രതിരോധ ഇടപാട് കമ്പനിയായ ഡി.സി.എന്‍.എസുമായി കരാറുണ്ടാക്കുന്നതില്‍ ഇടനിലക്കാരനായ ഈ മുതിര്‍ന്ന ഉദ്യോഗസ്ഥന്‍ വഴിയാകാം നാവികസേനാ രഹസ്യങ്ങള്‍ ചോര്‍ന്നതെന്ന് വാര്‍ത്ത പുറത്തുവിട്ട ദ ഓസ്‌ട്രേലിയന്‍ പത്രത്തിന്റെ റിപ്പോര്‍ട്ടില്‍ പറയുന്നു.



തങ്ങളില്‍നിന്നു വിവരങ്ങള്‍ ചോര്‍ന്നിട്ടില്ലെന്ന് ഫ്രഞ്ച് കമ്പനിയായ ഡി.സി.എന്‍.എസ് അവകാശപ്പെട്ടിരുന്നു. ഇതാണ് ഇപ്പോള്‍ പൊളിഞ്ഞത്.



ഇന്ത്യയില്‍നിന്നു തന്നെയാവും വിവരങ്ങള്‍ ചോര്‍ന്നതെന്നും വിവരങ്ങള്‍ പുറത്തായത് തങ്ങളുടെ ഇടപാടുകാരെ പ്രതികൂലമായി ബാധിച്ചതായും കമ്പനി പത്രക്കുറിപ്പില്‍ പറഞ്ഞിരുന്നു.



എന്നാല്‍ ഇന്ത്യയില്‍നിന്നാണ് വിവരങ്ങള്‍ ചോര്‍ന്നതെന്ന ഫ്രഞ്ച് കമ്പനിയുടെ വാദം നാവികസേന നിഷേധിച്ചു. സംഭവത്തില്‍ ഇന്ത്യയും ഫ്രഞ്ച് കമ്പനിയും അന്വേഷണം പ്രഖ്യാപിച്ചിരുന്നു.



 'റെസ്ട്രിക്റ്റഡ് സ്‌കോര്‍പീന്‍ ഇന്ത്യ' എന്നു പേരിട്ടിരിക്കുന്ന രേഖകള്‍ ചോര്‍ന്ന വിവരം ദ ഓസ്‌ട്രേലിയന്‍ പത്രം ആണ് പുറത്തുവിട്ടത്.



മുബൈയിലെ പ്രതിരോധമന്ത്രാലയത്തിനു കീഴിലുള്ള മഡ്ഗാവ് കപ്പല്‍ശാലയില്‍ നിര്‍മാണത്തിലിരിക്കുന്ന മുങ്ങിക്കപ്പലുകളുടെ പ്രവര്‍ത്തനരീതിയും മറ്റുവിവരങ്ങളും അടങ്ങുന്ന 22,000 പേജുകള്‍ ചോര്‍ന്നുവെന്നാണ് റിപ്പോര്‍ട്ട്.



ഫ്രഞ്ച് പ്രതിരോധ ഇടപാട് കമ്പനിയായ ഡി.സി.എന്‍.എസ് ആണ് ഈ സാങ്കേതികവിദ്യ ഇന്ത്യയ്ക്കു കൈമാറിയത്. ഈ കമ്പനിയില്‍ നിന്ന് ആറു സ്‌കോര്‍പീന്‍ അന്തര്‍വാഹിനിയാണു നാവികസേനയ്ക്കു വേണ്ടി നിര്‍മിക്കുന്നത്. അന്തര്‍വാഹിനിയുടെ എല്ലാ വിവരങ്ങളും സംബന്ധിച്ചുള്ള രേഖകള്‍ ചോര്‍ന്നതായി റിപ്പോര്‍ട്ടില്‍ പറയുന്നു.