മക്ക: കൊവിഡ് മഹാമാരിക്കിടെ ലോകമാകെ ആശ്വാസത്തിനായി പ്രാര്‍ഥനകളില്‍ അഭയം തേടുന്ന പ്രതിസന്ധിക്കാലത്ത് ചരിത്രമായിത്തീരുന്ന ഈ വര്‍ഷത്തെ വിശുദ്ധ ഹജ്ജ് കര്‍മങ്ങള്‍ക്ക് നാളെ തുടക്കമാകും. വിവിധ ഭാഗങ്ങളില്‍നിന്ന് അല്ലാഹുവിന്റെ അതിഥികളായി ഒഴുകിയെത്തിയ തീര്‍ഥാടക സംഗമത്തിനു സാക്ഷിയാകാന്‍ ഇനി മണിക്കൂറുകള്‍ മാത്രം.

പരിശുദ്ധ ഹജ്ജ് കര്‍മങ്ങള്‍ക്ക് ഞായറാഴ്ച തുടക്കം കുറിക്കുന്നതിന് മുന്നോടിയായി തിരഞ്ഞെടുക്കപ്പെട്ട ഹാജിമാര്‍ ഇന്നും നാളെയുമായി മക്കയില്‍ എത്തിച്ചേരും.
ദൂരദിക്കുകളില്‍നിന്നുള്ള ഹാജിമാര്‍ കഴിഞ്ഞ ദിവസങ്ങളില്‍തന്നെ യാത്ര തിരിച്ചിരുന്നു. കിഴക്കന്‍ പ്രവിശ്യകളില്‍നിന്നടക്കം പുറപ്പെട്ട ഹാജിമാര്‍ മദീന സിയാറത്തിനു ശേഷമാണ് മക്കയിലേക്കു തിരിക്കുക.

കൊവിഡ് പ്രോട്ടോക്കോള്‍ പൂര്‍ണമായും പാലിച്ച് തിരക്കുകളില്ലാതെ വ്യക്തമായ മുന്നൊരുക്കങ്ങളോടെയാണ് തീര്‍ഥാടകരുടെ നീക്കങ്ങള്‍ക്ക് അനുമതി നല്‍കുന്നത്. 30 ലക്ഷത്തോളം ആളുകള്‍ സംഗമിക്കാറുള്ള ഹജ്ജിന് ഇത്തവണ സഊദിയില്‍നിന്നുള്ള 60,000 പേര്‍ക്കു മാത്രമാണ് അനുമതി. ഞായറാഴ്ച രാത്രി മിനായില്‍ താമസിക്കുന്ന ഹാജിമാര്‍ തിങ്കളാഴ്ച പുലര്‍ച്ചെ മുതല്‍ അറഫാത്തിലേക്ക് യാത്രയാകും. തിങ്കളാഴ്ചയാണ് അറഫാസംഗമം.