താമരശ്ശേരി: ഗ്രാമപഞ്ചായത്തിലെ അങ്ങാടികളും ഏഴ്, ഒന്‍പത്, 12 വാര്‍ഡുകളും ഉള്‍പ്പെടുത്തി സമ്പൂര്‍ണ മാലിന്യ നിര്‍മാര്‍ജന പരിപാടി ഗാന്ധിജയന്തി ദിനത്തില്‍ ട്രയല്‍ അടിസ്ഥാനത്തില്‍ പ്രവര്‍ത്തനമാരംഭിക്കുമെന്നു ഗ്രാമപഞ്ചായത്ത് പ്രസിഡന്റ് കെ. സരസ്വതി, വൈസ് പ്രസിഡന്റ് കെ.സി മാമു മാസ്റ്റര്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.
കുടുംബശ്രീ അയല്‍കൂട്ടങ്ങള്‍, വ്യാപാരികള്‍ എന്നിവരുടെ സഹകരണത്തോടെയാണു പദ്ധതി പ്രാവര്‍ത്തികമാക്കുക. താമരശ്ശേരി ടൗണ്‍ ശുചീകരണത്തോടൊപ്പം കടകള്‍, ഫ്‌ളാറ്റുകള്‍, സ്‌കൂളുകള്‍, വീടുകള്‍ എന്നിവിടങ്ങളില്‍ നിന്നു മാലിന്യങ്ങള്‍ തരംതിരിച്ച് മാലിന്യങ്ങള്‍ റീസൈക്കിളിങ്ങിനു കയറ്റി അയക്കുന്ന പദ്ധതിയാണിത്. ടൗണില്‍ ഫൂട്പാത്ത് നവീകരണം, ശുദ്ധജല വിതരണ പദ്ധതി, വൈദ്യുതി ശ്മശാന നിര്‍മാണം, ആധുനിക അറവുശാലയുടെ നിര്‍മാണം എന്നിവയെല്ലാം പദ്ധതിയിലുണ്ടെണ്ടന്നും അവര്‍ പറഞ്ഞു.
വാര്‍ത്താസമ്മേളനത്തില്‍ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്‍ ജെസ്സി ശ്രീനിവാസനും പങ്കെടുത്തു.