ന്യൂഡല്‍ഹി: രാജസ്ഥാനിലുണ്ടായ സംഭവവികാസങ്ങളില്‍ സോണിയാ ഗാന്ധിയോട് മാപ്പുചോദിച്ചതായി അശോക് ഗെഹ്‌ലോട്ട്. സോണിയ ഗാന്ധിയുമായി ചര്‍ച്ചകള്‍ നടത്തിയ ശേഷം മാധ്യമങ്ങളോടാണ് അദ്ദേഹം ഇക്കാര്യം പറഞ്ഞത്.

അധ്യക്ഷ തെരഞ്ഞെടുപ്പില്‍ മത്സരിക്കില്ലെന്നും അശോക് ഗെഹ്‌ലോട്ട് വ്യക്തമാക്കി. താന്‍ മുഖ്യമന്ത്രിയായി തുടരണോയെന്ന് സോണിയാ ഗാന്ധി തീരുമാനിക്കുമെന്നും ഗെഹ്‌ലോട്ട് പറഞ്ഞു. ഇതോടെ അധ്യക്ഷ സ്ഥാനത്തേക്കുള്ള പോര് ദിഗ് വിജയ് സിംഗും ശശി തരൂരും തമ്മിലായിരിക്കുമെന്ന് ഉറപ്പായിരിക്കുകയാണ്.

50 വര്‍ഷമായി അച്ചടക്കമുളള കോണ്‍ഗ്രസ് പ്രവര്‍ത്തകനാണെന്നും ഇന്ദിരാഗാന്ധി, രാജീവ് ഗാന്ധി, സോണിയാ ഗാന്ധി എന്നിവര്‍ക്കൊപ്പം പ്രവര്‍ത്തിക്കാനായെന്നും അദ്ദേഹം ഓര്‍മിപ്പിച്ചു. കേന്ദ്രമന്ത്രിയായും മൂന്ന് തവണ മുഖ്യമന്ത്രിയായും പ്രവര്‍ത്തിക്കാനായെന്നും ഗെഹ്‌ലോട്ട് പറഞ്ഞു. രാജസ്ഥാനിലുണ്ടായ സംഭവങ്ങളില്‍ ദുഃഖമുണ്ടെന്നും അദ്ദേഹം വ്യക്തമാക്കി.