ദുബൈ:സമന്വയ വിദ്യാഭ്യാസ രംഗത്ത് കടമേരി റഹ്‌മാനിയ്യ നല്‍കിയ സംഭാവനകള്‍ നിസ്തുലവും മാതൃകാപരവുമാണെന്ന് പാണക്കാട് സ്വാദിഖലി തങ്ങള്‍.നീണ്ട അന്‍പത് വര്‍ഷമായി വൈജ്ഞാനിക നവോത്ഥാന പ്രവര്‍ത്തനങ്ങളുമായി മുന്നേറുന്ന റഹ്‌മാനിയ്യ അറബിക് കോളേജ് സമൂഹത്തിന്റെ പ്രതീക്ഷയാണെന്നും റഹമാനിയ്യ അറബി കോളജ് പ്രസിഡന്റ് കൂടിയായ പാണക്കാട് സയ്യിദ് സ്വാദിഖലി ശിഹാബ് തങ്ങള്‍ അഭിപ്രായപ്പെട്ടു. 2022 ഡിസംബര്‍ 23 മുതല്‍ 25 വരെ നടക്കുന്ന കടമേരി റഹ്‌മാനിയ്യ ഗോള്‍ഡന്‍ ജൂബിലിയുടെ ജി സി.സി തല പ്രചാരണ പോസ്റ്റര്‍ പ്രകാശനം ചെയ്തു സംസാരിക്കുകയായിരുന്നു അദ്ദേഹം. ലിബറലിസവും മത രഹിത യുക്തിവാദ ചിന്താഗതികളും ഉയര്‍ത്തുന്ന സാമൂഹിക സാംസ്‌കാരിക പ്രതിസന്ധികളെ മറികടക്കാന്‍ റഹ്‌മാനിയ്യ കാംപസില്‍ നിര്‍മാണം പൂര്‍ത്തിയായിക്കൊണ്ടിരിക്കുന്ന കോട്ടുമല ബാപ്പു മുസ്ലിയാര്‍ സ്മാരക തിയോപാര്‍ക്ക് പര്യാപ്തമാകുമെന്നും തങ്ങള്‍ കൂട്ടിച്ചേര്‍ത്തു. റഹ്‌മാനിയ്യ യു. എ.ഇ ചാപ്റ്റര്‍ പ്രസിഡണ്ട് ഇബ്രാഹീം മുറിച്ചാണ്ടി അധ്യക്ഷത വഹിച്ചു.ശംസുദ്ദീന്‍ ബിന്‍ മൊയ്തീന്‍, പുത്തൂര്‍ റഹ്‌മാന്‍, പി.കെ അന്‍വര്‍ നഹ, പൊട്ടങ്കണ്ടി അബ്ദുല്ല, ഒ.കെ ഇബ്രാഹീം, പാറക്കല്‍ മുഹമ്മദ്, കുറ്റിക്കണ്ടി അബൂബക്കര്‍,ഹസ്സന്‍ ചാലില്‍, മൊയ്തു അരൂര്‍, പി.കെ അബ്ദുല്‍ കരീം നാസര്‍ റഹ്‌മാനി പങ്കെടുത്തു.